११ गू व २५ गू बुँदा भिंकेफइगु मू मू स्वंगू दलया धापू
मू मू स्वंगू दलया प्रभावशाली नेतातसें नेकपा माओवादी लिसें असन्तुष्ट दलयात चुनावय् ब्वति कायेकेगु लकस दयेकेत ११ गू बुँदाया राजनीतिक सहमति व राष्ट्रपतिपाखें जारी याःगु २५ गू बाधा फुकाउ अडकाउ आदेशय् संशोधन यायेत तयार जूगु धाःगु दु । एकीकृत नेकपा माओवादीया नेता पोष्ट बहादुर बोगटी, नेपाली कांग्रेसया नेता अर्जुन नरसिंह के.सी. व नेकपा एमालेया छ्याञ्जे शंकर पाखरेलं उकथंया प्रतिबद्धता प्वंकादीगु खः ।
रिपोर्टस क्लब नेपालं मंगलवाः ग्वसाः ग्वःगु साक्षात्कार ज्याझ्वलय् एमाओवादीया नेता पोष्ट बहादुर बोगटीं मंसीर ४ गते जुइगु चुनाव व सरकारया खारेजी बाहेक फुक्क विषयस सम्झौता यायेत तयार दुगु धयादिल । वार्ता धयागु गिभ एण्ड टेक जूगुलिं असन्तुष्ट फुक्क माग पूमवनीगु धयादिसें नेता बोगटीं उच्चस्तरीय राजनैतिक समितिया विस्तार, गोलमेच सम्मेलन यायेगु व न्हापाया संविधानसभाय् जूगु सहमतियात स्वीकार यायेगु विषयस नं थःपिं सकारात्मक जूगु धयादिल ।
ज्याझ्वलय् नेपाली कांग्रेसया नेता अर्जुन नरसिंह के.सीं सरकारया परिवर्तन व चुनावया तिथि लिछ्यायेगु बाहेक फुक्क असन्तुष्ट पक्षयागु माग पूवंकेत कांग्रेस तयार दुगु धयादिल । संघीयताया हुनिं संविधान दयेके मफूगु धयादिसें नेता के.सीं. संविधानसभाया चुनावलिसें उगु विषयस नं जनमत संग्रह यायेमाःगु धयादिल ।
अथेहे नेकपा एमालेया नेता शंकर पोखरेलं चुनावया सुनिश्चितताया नितिं ११ गू व २५ गू बुँदा च्वय्क्वय् जुइफइगु धयादिल । अथेखःसां खारेजी धाःसा असम्भव जूगु धयादिल ।
ज्याझ्वलय् नेकपा माओवादी छ्याञ्जे देव प्रसाद गुरुंगं यथास्थितिइ चुनाव यायेत स्वःसा उगु चुनाव छुं नं हालतय् मान्य मजुइगु धयादिल ।
अथेहे मधेसी जनअधिकार फोरम नेपालया नायः उपेन्द्र यादवं यथास्थितिइ मंसीर ४ गते संविधानसभया चुनाव जुइमफइगु धयादिल । वय्कलं अजाःगु चुनावया विरोधय् सतक आन्दोलन यायेगु ख्याच्वः बियादिल । देश ११ गू व २५ गू बुँदाया आदेशं ब्वलकूगु राजनीतिक संकटय् लाःगुलिं न्हापां राजनीतिक समस्या ज्यंकेमाःगु धयादिसें नायः यादवं राजनीतिक समस्या मज्यंकं चुनावं निकास बीमफइगु दावी यानादिल ।
