सर्वोच्चपाखें थःगु अन्तरिम आदेश खारेज
सर्वोच्च अदालतं नागरिकता मदयेकं किपा दुगु मतदातातय्गु नां धलखय् दुमथ्याकेगु नितिं बिउगु थःगु हे अन्तरिम आदेश खारेज याःगु दु ।
कायममुकायम प्रधानन्यायाधिस दामोदर प्रसाद शर्मा व न्यायधिसत गिरीशचन्द्रलाल व तर्कराज भट्टया विशेष इजलासं मंगलवाः नागरिकता मदुपिन्त मतदाता म्हसीका पौ मबीत थ्वस्वयां न्ह्यः सर्वोच्चं बिउगु अन्तरिम आदेश खारेज याःगु खः ।
मतदातातय्गु नां मुंकेगु ज्या क्वचायेधुंकूगलिं अन्तरिम आदेशयात निरन्तरता बीम्वाःगु आदेशय् न्ह्यथनातःगु दु । अधिबक्ता पूर्णचन्द्र पौडेलं दायर याःगु रिटय् प्रारम्भिक सुनुवाइ यासें न्यायाधिस सुशीला कार्कीया इजलासं असार २१ गते नागरिकता मदुपिन्त मतदाता म्हसीका पौ दयेकेगु ज्या तत्काल दिकेत अन्तरीम आदेश बिउगु खः ।
सर्वोच्चया उगु आदेश लिपा मधेसवादी दलं फैसला मधेस विरोधी जूगु धासें आपत्ति प्वंकूगु खःसा सद्भावना पार्टी विरोध जुलुस पिकाःगु खः ।
