वैद्य व यादवलिसे राजनीतिक समितिं याकनं वार्ता याइगु
मू मू प्यंगू दलया शीर्ष नेतात दुथ्याःगु उच्चस्तरिय राजनीतिक समितिं नेकपा-माओवादी व मधेसी जनअधिकार फोरम नेपाल लिसे याकनं हे वार्ता यायेगु क्वःछिउगु दु ।
राजनीतिक समितिया कजि नापं एकीकृत नेकपा माओवादीया नायः पुष्पकमल दाहाल प्रचण्डं नेकपा-माओवादीया नायः मोहन वैद्य किरण व फोरम नेपालया नायः उपेन्द्र यादवलिसे अलग अलग हे सहलह यानादीगु खः । सहलह लिपा शुक्रवाः सनिलय् च्वंगु मुँज्याय् कजि प्रचण्डं बैद्य व यादव वार्ताय् वयेत तयार जूगु जानकारी बियादीगु खः ।
नेकपा-माओवादी व फोरमलिसे जूगु वार्तायात कयाः मुँज्याय् कजि प्रचण्डं जानकारी याकादीगु खः । नापं निगुलिं दल वार्ताया नितिं तयार जूगु कजिं जानकारी बियादीगु एकीकृत माओवादीया न्वकू नारायणकाजी श्रेष्ठं धयादिल ।
थ्वहे झ्वलय् नेकपा एमालेया नेता रघुजी पन्तं माओवादीं ३३ गू दलयात दुथ्याकाः वार्ता पुचः पुर्नगठन यायेधुंकाः राजनीतिक समितिं वार्ता यायेगु जानकारी बियादिल ।
थ्वस्वयां न्ह्यः राजनीतिक समितिया कजि नापं एमाओवादी नायः प्रचण्डं शुक्रवाः सुथय् नेकपा-माओवादी नायः बैद्यलिसे नापलानाः सहलह ब्याकादीगु खः । नापलायेगु झ्वलय् राजनीतिक समितिं याःगु आह्वानयात कयाः सहलह जूगु खः ।
उगु सहलहस कजि प्रचण्डं वार्ताया आह्वान सशर्त मजूगु धयादीगु माओवादी प्रवक्ता पम्फा भुषालं पिथनादीगु विज्ञप्तीइ न्ह्यथनातःगु खः । अथेहे माओवादी नायः वैद्यं धाःसा निःशर्त वार्ताया आह्वान जूसा थःगु पार्टी व आन्दोलन यानावयाच्वंगु ३३ गू दलीय मोर्चाय् सहलह यानाः माःकथं क्वःछीगु धयादीगु खः ।
थ्वस्वयां न्ह्यः कजि प्रचण्डं नापलायेत स्वःसां बैद्यं नापलायेत माने मजूगु खः ।
मेखे सरकारं वार्ताय् वयेत इनाप यासें नेकपा माओवादीयात औपचारिक पौ छ्वःगु दु । मन्त्रीपरिषद, परामर्श नापं समन्वय समितिया कजि नापं गृहमन्त्री माधवप्रसाद घिमिरें वार्ताय् वयेत आह्वान यानादिसें शुक्रवाः नेकपा माओवादीया नायः मोहन वैद्य किरणयात पौ छ्वयादीगु खः ।
वार्ता, सम्बाद व सहलहपाखें समाधानयात ज्यंकेफइगु धासें पतिइ नेकपा माओवादी व सम्बद्ध मोर्चायात वार्ताया नितिं हाकनं ब्वंगु दु । वार्ताया नितिं थाय् व ई निगू पक्षया सहमतिइ क्वःछीफइगु उगु पतिइ न्ह्यथनातःगु दु ।
थ्वस्वयां न्ह्यः मन्त्रीपरिषदया विहिवाः च्वंगु मुँज्यां नेकपा माओवादीं वार्ता पुचः दयेकूगुलिं उकियात लसकुस यासें वार्ताय् वयेत माओवादी व सम्बद्ध ३३ गू दलीय मोर्चायात आह्वान याःगु खः ।
