कवितां तापानाच्वंम्ह छम्ह डाक्टर कवि

'छगू दीप छगू लाश' थेंज्याःगु चर्चित कविता मुना पिथनाः नेपालभाषाया आधुनिक काव्य ख्यलय् पलाः तयादीम्ह कवि योगेन्द्र प्रधान थौंकन्हय् कवि स्वयां नं डाक्टरया रुपय् अप्वः व्यस्त जुयादीगु दु । नेपाल स्वास्थ्य विज्ञान अध्ययन संस्थान स्टुपा कलेजय् सुथंनिसें बहनी थ्यंक देशया स्वास्थ्य क्षेत्रया लागिं मानवीय शक्ति उत्पादन यायेगु ज्याय् ब्यस्त जुइमाःगुलिं कविता व साहित्यं भचा तापानाच्वनागु खँ वय्कलं स्वीकार यानादी ।

व्यस्त नं थपाय्कं कि सुथय् ५-६ बजे हे वय्कः सूर्यविनायकया सुन्दर बस्तीस्थित थःगु छें पिहां वयेधुंकी । साढे ६ बजे ला येँया चाबहिली च्वंगु स्टुपा कलेजय् वय्कः थ्यने हे धुंकी । वय्कलं जनस्वास्थ्य विषयय् विद्यावारिधी यानादीगु खः । आः वय्कः न्हू डाक्टर जुईपंत आखः स्यनीम्ह डाक्टर खः । वय्कलं ग्रामीण स्वास्थ्य व जनस्वास्थ्य लागाय् नं तःधंगु योगदान यानादीगु दु ।

ख्वपया तेखापुखू त्वालय् मां मंगलादेवी प्रधानाङग व अबु शिवप्रसाद प्रधानाङगया काय् कथं बूम्ह डा. योगेन्द्र प्रधानं शुरुइ भक्तपुर क्याम्पसय् शिक्षण यानादीगु खः । वयां लिपा वय्कः जनस्वास्थ्य विषयय् स्नातकोतर यायेत अमेरिकाया क्यालिफोर्निया झाल । २०२७ सालपाखेया खँ खः थ्व । वयां लिपा पीएचडी यायेत अमेरिकाया हे हवाई विश्वविद्यालय झाल । उखेरं २०४४ सालय् पीएचडी पूवंकेधुंकाः वय्कः नेपाः वयाः सेवा शुरु यानादिल । नीदँ नीनिदँ तक वय्कलं चिकित्साशास्त्र अध्ययन संस्थान महाराजगंजय् स्वास्थ्य सेवा विषयय् ब्वंकादिल । अनं रिटायर्ड जुइधुंकाः आः निदँ न्ह्यवंनिसें चावहीया नेपाल स्वास्थ्य विज्ञान अध्ययन संस्थान स्टुपा कलेजय् अध्यापन यानाच्वनादीगु दु ।

सन् १९७८ य् पब्लिक हेल्थ विषयय् पीएचडी क्वचायेके धुनेवं वय्कः जनस्वास्थ्य विषयय् अध्यापन याकेगु ज्याय् हे ब्यस्त जुयादिल । वय्कलं गुलि नं कविता च्वयादिल व फुक्क वयां न्ह्यःया इतिहास खः । छगू ल्याखं धायेगु खःसा वय्कःया साहित्यिक जीवनं थनं लिपा दिपाः काल । खतुं आः नं वय्कः छुं छुं साहित्यिक ज्याझ्वलय् मथ्यंगु ला मखु तर उकियात वय्कलं अबलय् च्वयागु साहित्यया हे लबः जक खः धयादी । आः ला सुनानं इनाप याःसा हे जक कवि ब्यक्तित्वया प्रदर्शन यानाः छपु निपु कविता च्वयेगुली वय्कः सीमित दु । कविता बाहेक वय्कलं मेगु विधाय् उलि ल्हाः न्ह्याकामदी । अथे खःसां गुगु विधाय् वय्कलं च्वसा न्ह्याकादिल उकी धाःसा वय्कः सफल नं जुयादिल । नेपालभाषाया आधुनिक कविता लागाय् वय्कः न्हापां 'लुसः' कविता मुना ज्वनाः पिलू झाःगु खः । वयां लिपा 'छगू दीप छगू लाश' पिहां वल गुकियात आः तक नं नेपालभाषा आधुनिक काव्यया छगू मूवंगु कृतिया रुपय् कायेगु याः नि । अनंलि 'हाबलासा' व 'लुमधंगु लकस' नांगु निगू कविता संग्रह पिथनादिल । थ्व बाहेक सफू जुइ मफुनिगु मेगु नं आपालं फुटकर कवितात उखेंथुखें लानाच्वंगु दनि ।

विराट नेपालभाषा साहित्य सम्मेलन गुथिनाप भ्यलेपुनाः नं वय्कलं उलि हे कविता सिर्जना यानादिल । डा. प्रधान दिमागं डाक्टर खःसां नुगलं कवि हे खः । वय्कःया शालीन स्वभावय् डाक्टरया वासः स्वयां कविताया भावुकता अप्वः बास वः । ल्याय्म्ह इलय् हे वय्कलं नेपालभाषायात प्यंगू काव्य कृति बियादिल । तर आः धाःसा वय्कःया फाट्टफुट्ट कविता तकं पिहां वःगु स्वये मदु । थौंकन्हय् विराट गुथिया सल्लाहकार जुयादीम्ह योगेन्द्र प्रधानयात आः फाट्टफुट्ट कविता च्वयेगु ई पिकायेत तकं थाकु । अथे खःसां वय्कःया बिचाः व चिन्तन धाःसा अथे हे अटल तिनि गथे कि 'छगू दीप छगू लाश' दुने दुथ्यानाच्वंगु वय्कःया कवितात अटल खः ।

कृष्ण

More Stories Like this