जगदम्बाया निर्देशक व महाप्रबन्धकयात जेल चलान
बाराया सिमराय् च्वंगु जगदम्बा स्टिल्स प्रा.लि.या कार्यकारी निर्देशक रोसित उन्नितथान व महाप्रबन्घक कमलजीत बर्मायात जेल चलान याःगु दु । किर्ते जालसाजीया द्वपनय् पूर्पक्षया नितिं जिल्ला अदालत पर्सां उमित जेल चलान याःगु खः ।
थ्वहे झ्वलय् पुलांम्ह कर्मचारी ओमप्रकाश बैठा धाःसा न्यागू लख तकाया धरौटीइ त्वःतूगु दु । वय्कयःयात अदालतं न्यागू लख तकाया धरौटीइ त्वःतेत प्रहरीयात उजं बिउगु खःसा रोसित व कमलजीतया धाःसा जेल चलान यायेत अदालतं प्रहरीयात आदेश बिउगु खः । रोसित व बर्मा भारतीय नागरिक जूगुलिं धरौटीइ त्वःते मछिंगु प्रहरीं न्ह्यथंगु दु ।
गाडी न्याःगु भ्वँ व छाप किर्ते याःगु द्वपनय् ज्वंपिं रोसित व बर्मायात प्रहरीं थुनछेक बहसया नितिं अदालतय् उपस्थित याकूगु खः ।
जगदम्बां ७ गू सिट दुगु मोडल नं. २००५ या महेन्द्रा स्कारपियो गाडी बीरगञ्ज भन्सारपाखें २०६८ पुष ७ गते लिलामी सकार याःगुली किर्ते यानाः मोडल नं. २०१० व सिटया ल्याः ९ गू दयेकाः ना २ च ४६६२ ल्याखय् दर्ता याःगु खनेदयेवं उमित ज्वंगु प्रहरीं न्ह्यथंगु दु ।
