वार्ता समिति दयेकूगुलिं मन्त्रीपरिषदपाखें लसकुस
नेकपा माओवादीपाखें समस्या ज्यंकेगु नितिं समिति दयेकूगुलिं उकियात मन्त्रीपरिषदपाखें सकारात्मक धासें लसकुस याःगु दु । विहिवाः च्वंगु मन्त्रीपरिषदया मुँज्यापाखें उगु कथं लसकुस याःगु खः ।
मुँज्यालिपा नेपाल सरकारया प्रवक्ता माधव प्रसाद पौडेलं फुक्क समस्याया समाधान वार्ता व सहलहपाखें जुइगु विश्वास प्वंकादिसें वार्ताया नितिं नेकपा माओवादी व सम्बद्ध मोर्चायात हाकनं वार्ताय् वयेत इनाप यानादिल ।
मुँज्यां अख्तियार दुरुपयोग अनुसन्धान आयोगयात न्यागू विकास क्षेत्रय् ज्याकू चायेकेगु सम्बन्धय् न्हूगु संगठन संरचना व दरबन्दी स्वीकृत याःगु दु । उकथं आः धनकुता, हेटौंडा, पोखरा, सुर्खेत व दिपायलय् आयोगया क्षेत्रीय ज्याकुथि चायेकीगु जूगु दु ।
मुँज्यां कृषि विभागया न्हापांगु श्रेणीया कर्मचारी डा. कृष्णप्रसाद पन्तं साउन २ गतेनिसें लागू जुइकथं बियादीगु स्वीकृत याःगु दु । पाटन स्वास्थ्य विज्ञान अस्पतालय् १६ म्ह विदेशी विशेषज्ञ व वय्कःपिनि छेँजःपिन्त निशुल्क भिषा बीगु, सेनापति गौरव शम्सेर राणायात बेलायतया सेनाध्यक्षया ब्वनाय् वइगु भाद्र २१ गतेनिसें २६ गतेतकया भ्रमणया नितिं अनुमति बीगु, सेनाया प्राविधिक महासेनानी शरदलाल श्रेष्ठयात बढुवा यायेगु, कोशी टप्पु बन्यजन्तु आरक्ष विस्तार यायेगु झ्वलय् लाःगु जग्गाया खँय् क्वःछीत समिति दयेकेगु क्वःछिउगु दु ।
सूचना तथा सञ्चार मन्त्री पौडेलया कथं मुँज्यां बैदेशीक लजगाया नितिं वनीपिनिगु नितिं व्यवस्थित यायेत व व्यवसायया इजाजत सम्बन्घी निगू निर्देशिका सम्बन्धित थासय् छ्वयेगु, वइगु भाद्र १० गते अमेरिकाय् जुइत्यंगु फोहरमैलापाखें उत्पादन जुइगु उर्जा सम्बन्धि सम्मेलनय् स्थानीय विकास मन्त्रालयया सचिव शान्त बहादुर श्रेष्ठया नेतृत्वय् पुचः छ्वयेगु, राष्ट्रिय ट्रमा सेन्टर विकास समिति गठन आदेशया मस्यौदा पारित यायेगु, डोटीया काँडामाण्डौंलय् सीपिं मिलन दमाइ लिसेंया प्यम्हेसिगु छेँजःपिन्त छगू लख तकाया दरं क्षतिपूर्ति बीगु नं क्वःछिउगु दु ।
