धरौटी मतयेवं डन लामायात जेल चलान
विशेष अदालतं माग याःगु स्वंगू करोड धरौटी मतयेवं डन गणेश लामायात डिल्लीबजाः सदरखोर चलान याःगु दु ।
जेल वने न्ह्यः अदालत परिसरय् सञ्चारकःमित लिसे खँल्हानादिसें लामां थः राजनीति याइम्ह जूगुलिं थःत फसेयाःगु दावी याःगु दु । वय्कलं याकनं हे अदालतपाखें न्याय प्राप्त जुइगु नं आशा प्वंकल ।
अदालतया नायः केदारप्रसाद चालिसे नापं मोहनरमण भट्टराई व भूपेन्द्र प्रसाद राईया मंकाः इजलासं विहिवाः थुनछेक बहसलिपा लामालिसें स्वंगू करोडया धरौटी माग याःगु खः । माग याःकथं धरौटी मतयेवं लामायात थुनाय् छ्वःगु अदालतया रजिष्टार धीरबहादुर चन्दं जानकारी बियादिल ।
म्हिगः बुधवाः बहस क्वमचाःगुलिं लामायात प्रहरी प्रभाग सिंहदरवारय् न्यायिक हिरासतय् छ्वःगु खः । लामा थः अबु, किजा व दलबललिसें म्हिगः बुधवाः सुथय् अदालतय् उपस्थित जुइवं बहस न्ह्याःगु खः ।
सम्पत्ति शुद्धिकरण अनुसन्धान विभागं लामा लिसें न्याम्ह डनयात वंगु जेठ ३ गते विशेष अदालतय् मुद्दा दायर याःगु खः । फोरम लोकतान्त्रिकया केन्द्रीय दुजः तकं जुयादीम्ह लामायात २७ गू करोड, १ गू लख व ६१ गू द्वः तका अवैध सम्पत्ति कमेयाःगु द्वपं बियातःगु दु ।
थ्वस्वयां न्ह्यः अकुत सम्पत्ति कमेयाःगु द्वपं लानाच्वंम्ह मेम्ह डन परशुराम बस्नेत २ गू करोड धरौटीइ त्वःतूगु खःसा चक्रे मिलन जेलय् लानाच्वंगु दु ।
आः दीपक मनांगे व अभिशेष गिरीया मुद्दाय् सुनुवाइ याये ल्यं दनि ।
