एनआरएनपाखें खुसिवालं पीडिततय्त ग्वाहालि
हलिंन्यंकं न्यनाच्वंपिं गैरआवासिय नेपाःमितसें नेपाःया खुसिवालं पीडिततय्गु नितिं ५० गू लख तका ग्वाहालि याःगु दु ।
गैर आवासिय नेपाली संघया नयाः जीवा लामिछानेंया नेतृत्वय् बुधवाः सिंहदरवारय् थ्यंगु एनआरएन पुचलं मन्त्री परिषदया नायः खिलराज रेग्मीयात ५० गू लख तकाया चेक लःल्हाःगु खः । लःल्हाःगु धेबा "प्रधानमन्त्री दैवी प्रकोप राहत कोष"पाखें पीडित परिवारयात बीगु जुइ ।
थ्वहे झ्वलय् मन्त्री परिषदया नायः रेग्मीं पिने देशय् च्वंपिं नेपाःमितसें नेपाःया पीडित नेपाःमितय्गु नितिं याःगु ग्वाहालियात कयाः सुभाय् देछानादिल ।
गैर आवासीय नेपाली संघया वंगु जुन २१ निसें २३ तारिखय् क्वचाःगु यूरोप क्षेत्रीय सम्मेलनया झ्वलय् एनआरएनं आर्थिक संकलन अभियान न्ह्याकूगु खः । वहे आह्वान कथं हलिंन्यंक न्यनाच्वंपिं गैर आवासीय नेपाःमितसें मुंकूगु धेबाया न्हापांगु किस्ता राहत कोषयात लःल्हाःगु गैर आवासीय नेपाली संघया कार्यकारी निर्देशक राजेश रानां जानकारी बियादीगु दु । ग्वहालिया नितिं धेबा मुनेगु ज्या जुयाच्वंगुलिं मेगु किस्ता हाकनं लःल्हायेगु नं रानां जानकारी बियादिल ।
थ्वहे झ्वलय् एनआरएनया नायः जीवा लामिछानें गैर आवासीय नेपाःमितय्त मतदानया अधिकार, गैर आवासीय नेपाली संघया दर्ता व गैर आवासीय नेपाली संघया वइगु अक्टोबरय् येँय् जुइगु सम्मेलनया बारे नं मन्त्री परिषदया नायः रेग्मीयात जानकारी याकादिल ।
