डन लामा न्यायिक हिरासतय्
गुण्डागर्दी यानाः अवैध सम्पत्ति कमेयाःगु द्वपं लानाच्वंम्ह डन गणेश लामा बुधवाः विशेष अदालतय् हाजिर जूगु दु । थुनछेक बहस सिमधयेवं लामायात न्यायिक हिरासतय् छ्वःगु दु ।
अभियुक्त लामा थः अबु, किजा व दलबललिसें सुथसिया झिताः इलय् अदालतय् उपस्थित जूगु खः । लामां अदालतय् न्ह्यब्वःगु बयानय् थःगु सम्पत्ति अबैध मजूगु व कन्स्ट्रक्सन कम्पनीपाखें कमेयानागु दावी यानातःगु दु ।
वयानलिपा न्हिनय् अदालतया नायः केदार प्रसाद चालिसे नापं मोहनरमन भट्टराई व भूपेन्द्र प्रसाद राईया मंकाः इजलासय् सुनुवाइ जूगु खः । बहस क्वमचाःगुलिं लामायात प्रहरी प्रभाग सिंहदरवारया न्यायिक हिरासतय् छ्वःगु रजिष्टार धीर बहादुर चन्दं जानकारी बियादीगु दु । वय्कःया कथं सरकारी वकिलपाखें बहस क्वचाःगु दुसा कन्हय् विहिवाः प्रतिवादीया वकिलपाखें वहस जुइ । निगुलिं पक्षया बहसलिपा लामायात धरौटीइ त्वःतेगु वा कुनेगु धइगु क्वःजी ।
सम्पत्ति सुद्धिकरण अनुसन्धान विभागं लामालिसें न्याम्ह डन विरुद्ध जेठ ३ गते विशेष अदालतय् मुद्दा दायर याःगु खः । फोरम लोकतान्त्रिकया केन्द्रीय दुजः तकं जुयादीम्ह लामायात २७ गू करोड, १ गू लख व ६१ द्वः अबैध सम्पत्ति कमेयाःगु द्वपं बियातःगु दु ।
