पत्रकार हरिशचन्द्रया लुमन्ति मुँज्या

रेडियो नेपालया नेपालभाषा समाचार वाचक व पत्रकार नापं अधिबक्ता हरिशचन्द्र कारञ्जित मदुगुलिं नेवाः पत्रकार राष्ट्रिय दबू ख्वप कचाया ग्वसालय् वंगु शनिवाः क्षयरोग निवारण केन्द्र ख्वपय् छगू बिचाः मुँज्या जुल ।

छगू मिनेट मौन धारण यानाः संस्थाया न्वकू कृष्ण प्रजापतिं लसकुस याःगु उगु ज्याझ्वलय् बक्तातसें पत्रकार कारञ्जितया बहुआयामिक ब्यक्तित्वया बारे स्पष्ट यायेगु ज्या जूगु खः ।

ज्याझ्वलय् विराट गुथिया नायः प्रदीप शाक्यं मदुम्ह सञ्चारकःमि कारञ्जित साँस्कृतिक लागाय् नं च्वन्ह्याम्ह ब्यक्तित्व जूगु व थी थी बाजं थायेगु निसें म्ये रचनाय् नं ल्हाः दुगु खँ कनादिल ।

ज्याझ्वलय् वय्कःया सहपाठी ध्रुव मधिकःमिं नेपालभाषाप्रति अनुराग दुम्ह जुयाः हे वय्कः कमजोर आर्थिक अवस्थाया बाबजूद नं इमान्दारीपूर्वक नेपालभाषाया सेवा यानाच्वनादीम्ह ब्यक्तित्व खः धयादिल ।

नेवाः पत्रकार राष्ट्रिय दबूया मूछ्याञ्जे उदेन न्हूसाय्मिं मदुम्ह कारञ्जितया मस्तय्त उच्च शिक्षा अध्ययनया नितिं सरकार व रेडियो नेपालं व्यवस्था यायेमाःगु नापं वय्कःया छेँजःयात लजगाया व्यवस्था यायेत माग यानादिल ।

सभाय् ख्वप बार एशोसियसनया प्रतिनीधि दुर्गा अधिकारी, नेपाल पत्रकार महासंघ ख्वपया दांभरि नापं दबूया सल्लाहकार चन्द्रकृष्ण श्रेष्ठ व छेँजःपिनिपाखें किरणमान कारञ्जितपिन्सं वय्कःया ब्यक्तित्वबारे थःथःगु खँ न्ह्यब्वयादीगु खः ।

ज्याझ्वः दबूया ख्वप कचाया नायः कृष्णकाजी के.के. मानन्धरया सभाध्यक्षताय् जूगु खः । (सन्ध्या टाइम्स)

किपाः उदेन न्हूसाय्मि

More Stories Like this