रामशेखरयात हनेत सहलह

झी कलाकार रामशेखर नकःमि हना ज्याझ्वः तःजिक हनेत वंगु शनिवाः नेपालभाषा मंकाः खलः यलया भवनय् कलाकार परिषदपाखें सहलह मुँज्या यात ।

परिषदया संयोजक स्वयम्भूराज शाक्यया सभाध्यक्षताय् जूगु उगु मुँज्याय् झी कलाकार रामशेखर नकःमि हना ज्याझ्वः समितिया कजि राजेन्द्र मान शाक्यं रामशेखरयात हनेत्यनागु कारण स्पष्ट यानादिसें वइगु दिल्लागा ५ अर्थात साउन १२ गते येँया नेपाः बैंक्वेटय् हना ज्याझ्वः जुइगु जानकारी बियादिल ।

एकीकृत नेवाः राष्ट्रिय मुक्ति मोर्चाया मूछ्याञ्जे बदन शर्मां रामशेखरयात हनेत यलपाखें विशेष सम्मान कथं ज्याझ्वः न्ह्याका यंकेफूसा बांलाइगु बिचाः प्वंकादिल ।

समितिया सल्लाहकार डा. पुष्पराज राजकर्णिकारं रामशेखर नेपालभाषाया ज्वःमदुम्ह ब्यक्ति खः धयादिसें वय्कःया साहित्य जनपक्षीय जुइगु व कला क्षेत्रय् निरन्तरता बियादीगुलिं वय्कःयात सुभाय् देछानादिल ।

हना ज्याझ्वः समितिया सल्लाहकार नापं नेवाः जागरण मञ्चया नायः सुजीव बज्राचार्यं रामशेखरयात हनाया नापं वय्कःयात देछायेगु दांम्हिचाया नितिं ज्याझ्वलय् ब्वति काःवपिं फुपिन्सं फूकथं ग्वाहालि यायेमाःगु व हना ज्याझ्वः कुन्हु रामशेखरयात याइगु नागरिक अभिनन्दनय् ब्वति कायेमाःगु बिचाः प्वंकादिल ।

नेपालभाषा मंकाः खलः यलया नायः किरण शाक्यं सकल भाषाख्यःयापिन्सं मंकाः कथं हना ज्याझ्वः ताःलाकेमाःगु बिचाः प्वंकादिल ।

ज्याझ्वलय् ब्वतिकाःपिन्सं थी थी सल्लाह बियादीगु उगु सहलह मुँज्याय् नीद्वलं मल्याक आर्थिक ग्वाहालि मुंकेगु ज्या नं जूगु खः । ज्याझ्वलय् कलाकार सुरज ब्यञ्जनकारं लसकुस यानादीगु खः ।

अथेहे रामशेखर नकःमि हना ज्याझ्वःया झ्वलय् किपुली नं थी थी ज्याझ्वः न्ह्याकीगु जूगु दु । वइगु साउन ५ गते किपुलिं वय्कलं च्वयादीगु ख्यालः न्ह्यब्वइगु ग्वसाः दु ।
अथेहे रामशेखर नकःमियात मंकाः कथं हनापौ देछायेगु व ज्याझ्वःयात कयाः सहलह यायेगु नितिं कन्हय् बुधवाः येँया क्षेत्रपाटी पार्टी पालेसय् नेपालभाषाया थी थी खलः पुचः व जातीय संघसंस्थाया मुँज्या च्वनीगु जूगु दु ।

अथेहे याकनं हे सक्व, भ्वँत, बुंगय् नं हना ज्याझ्वः ताःलाकेगु नितिं स्थानीय नेवाः खलः पुचः व ब्यक्तित्वपिनि दथुइ सहलह मुँज्या यायेत्यंगु खँ सीदुगु दु । (सन्ध्या टाइम्स)

More Stories Like this