"नौलो तरंग"य् काजीराजया "आहा"

नेपालभाषा संगीत ख्यःया नांजाःम्ह म्ये च्वमि काजीराज शाक्यया याकः च्वसाय् व नांजाःम्ह लय् चिनामि हरिशरण साय्मिया याकः लसय् न्हूगु म्येचाः नेपालभाषाया "आहा" व खस भाषाया "नौलो तरंग" वंगु शनिवाः छगू ज्याझ्वःया दथुइ पितब्वज्या जुल ।

पितब्वज्या ज्याझ्वलय् मूपाहां कथं झायादीम्ह नेपाल संगीत तथा नाट्य प्रज्ञा प्रतिष्ठानया कुलपति अम्बर गुरुंग, विशिष्ट पाहां वरिष्ठ हास्य कलाकारपिं मदनकृष्ण श्रेष्ठ व हरिवंश आचार्यपिन्सं मंकाः कथं म्येचाया उलेज्या यानादीगु खः ।

ज्याझ्वलय् मूपाहां संगीतज्ञ अम्बर गुरुंगं थौकन्हय् दक्कलय् तःधंगु समस्या वा आवश्यकता धइगु धेबा जूगु धयादिसें मनूत सकलें धेबाया ल्यू ल्यू जुयाच्वन, थःके दुगु धेबा साहित्य संगीतया रचनाय् नं छ्यलेमाःगु विचाः प्वंकादिल । विविधतां हे एकता प्रदर्शन याइगु जूगुलिं निगुलिं म्येचालं उकियात प्रतिबिम्बित यानाच्वंगु व संगीत शान्ति व समृद्धिया सन्देश बीगु संगीतज्ञ गुरुंगया धापू खः ।

ज्याझ्वलय् न्ववानादिसें विशिष्ट पाहां मदनकृष्ण श्रेष्ठं नेपालभाषा व खस भाषा छगू हे लसय् थुकथं म्येचाः पिहांवःगु धयागु एकताया संकेत खः धयादिसें प्रविधिं बजाः कायेत थाकुल धकाः हारे मचासे प्रविधिया माध्यमं विदेशय् च्वंपिन्त नं उकिया सवाः कायेके खनीगुलिं अज्याःगु प्रविधियात झीसं नं खः कथं छ्यलाः लबः काये सयेकमाः धयादिल । यु-ट्यूबय् न्ह्याम्हेसिनं नं म्ये तयेपफइगु जूसां आधिकारीक मनुखं जक तये फइगु नं व्यवस्था याये जिउगुलिं मेपिन्सं तःगु म्येयात लिकयाबीगु नितिं उकिया संचालकतय्त झीसं इनाप यायेमाःगु सुझाव नं श्रेष्ठं बियादिल ।

मेम्ह विशिष्ट पाहां हरिवंश आचार्यं न्हापा न्हापा जूसा म्येचाः पिकायेबलय् अप्वः व्यापार जूसां थौं कन्हय् अजाःगु अवस्था मदुगु धयादिसें उकिया कारण यु-ट्यूब थेंजाःगु प्रविधि खः धयादिल । थौंकन्हय् छुं नं म्ये व उकिया म्यूजिक भिडियो पिहां वयाः बजारय् थ्यने न्ह्यः हे यु-ट्यूब थें जाःगु प्रविधिं मनूतय्गु छेँय् छेँय् थ्यनेधुंकीगु जक मखुसें सितिकं स्वयेगु प्रवृत्ति विकास जूगुलिं नं खः धकाः आचार्यं धयादिल । वय्कलं छम्ह हे च्वमिया च्वसाय् व छम्ह हे लय् चिनामि म्येया खँग्वः जक पाकाः थुकथं म्येचाः पिहांवःगुलिं राहत महसूस जूगु खँ नं कनादिल ।

ज्याझ्वःया सभाध्यक्ष प्रा. डा. मंगलसिद्धि मानन्धरं संगीत थःगु ख्यः मखुसां थज्याःगु सांगीतिक ज्याझ्वलय् सभाध्यक्ष जुइखंगु धयागु थःगु नितिं विशेष खँ जूगु धयादिसें पाहांपिन्त याकूगु न्हूगु कथंया आसन ग्रहणया व्यवस्थायात कयाः च्वछायादिल ।

म्ये च्वमि काजीराज शाक्यं लसकुस यानादीगु उगु ज्याझ्वलय् कलाकारतय्सं म्येचाकय् दुथ्यानाच्वंगु म्ये हालाः न्यंकादीगु खःसा स्टार कलिउड कल्चरया कलाकारतसें म्येचाकय् दुथ्याःगु म्येया छुं छुं ब्व स्वानाः हुलाप्याखं न्ह्यब्वःगु खः ।

ज्याझ्वलय् लय्चिनामि हरिशरण साय्मिं सुभाय् देछानादीगु खः ।

बिमोचित म्येचाकय् राजेश पायल राई, निशा देशार, प्राश्ना शाक्य, सतिश महर्जन, दीपा महर्जन, रत्नशोभा महर्जन, नील शाक्य, सुलिन्द्र शाक्य, हरिशरण साय्मि, निर्णय श्रेष्ठ, विकास श्रेष्ठ, सन्तोषा लामा, रचना शाक्य, सुमित्रा खड्का लिसेंया कलाकारतसें सः बियातःगु दु ।

म्येच्वमि शाक्यया "आहा" नेपालभाषाय् प्यंगूगु म्येचाः खःसा "नौलो तरंग" खस भाषाय् स्वंगूगु म्येचाः खः । थ्वस्वयां न्ह्यः नेपालाभाषाय् "निभाः लुइवं", "आगं" व "न्हूम्ह पासा" पिहांवयेधुंकूगु दुसा खस भाषाय् "झंकार" व "वैशालु यौबन" पिहांवयेधुंकूगु दु । (सन्ध्या टाइम्स)

More Stories Like this