नेवाः कर्मचारी संगठन थौंया मू आज्जु

देय्या अवस्था न्हिया न्हिं स्यना वनाच्वंगु दु । अझ धायेगु खःसा कुहां वनेगु बाहेक थहां वनीगु लँपुइ हे मलानाच्वंगु अवस्था दु । देय् स्यंगु धायेबलय् राजनीति प्रशासन लगायत दक्व ख्यः हे स्यंगु खः । देय् थज्याःगु अवस्थाय् गुकथं थ्यन धकाः वाला स्वयेबलय् न्ह्याथाय् नं राजनीतिक अर्थं हे जक स्वयेगु यानाच्वन । तर धात्थेंया समस्याया हुनि छु खः धइगु बांलाक बिचाः यानाः मस्वल ।

देय् संघीय धर्म निरपेक्ष गणतान्त्रिकया लँपुइ वनाच्वंगु आःया इलय् धाथें राजनीतिं जक समस्या समाधान याइ ला नकतिनि जेष्ठ १८ नेपालमण्डल बन्दया ज्याझ्वः नं बांलाक हे सफल जुल तर धाथें नेवाः जाति नेपालमण्डलया विकासया लँपुइ थुकिं ग्वाहाली याइ ला निश्चित रुपय् नेवाः भूमिइ आदिवासी जनजाति नेवाःतयत् सलंसः दँ न्ह्यवंनिसे उत्पीडन शोषण यानातःगु हे खः व उकिया निंतिं सकल नेवाःत छप्पँ जुयाः पिहांवःगु नं लसताया खँ हे खः । थुकी सरकारयात बांलाक हे नेवाः शक्तिया आभास जूगु दयेमाः । अथे ला २००७, २०३६, २०४६ सालया आन्दोलनय् नं नेवाःतयगु शक्तिं हे निर्णायक भूमिका म्हितूगु खः । अय्सां तबि नेवाःत गय् यानाः न्ह्याबलें लिउने लाःगु ले ? छु धाथें नेवाःतय्गु भूमिका कमजोर जूगु ला ? छु नेवाःत कतःया च्यः जक जूवनीगु ला ? वा नेवाः नेतातय्गु सामर्थ्य हे मदुगु ? वा नेवाःतय्के बुद्धि हे मदुगु ? वा नेवाःतय्सं कर्पिंसं नेवाःतय्त च्यः यानाः उपिं मालिक जुयाच्वंगु वाःचायेके मफुगु ?

च्वय् न्ह्यथनागु थीथी न्ह्यसःया लिसःया बारे वादविवाद जुइफु वा म्हिगः म्हीग जूगु नं जुइफु । न्ह्यागुसां नं आः देय्या परिस्थितं हानं छकः नेवाःतय्त छप्पँ जुइगु अवसर बिउगु दु । थःगु समस्याया हुनि हे जूसां नं चिन्तन मनन यायेगु ह्वःताः चूलाका बिउगु दु । थुकियात निरन्तर रुपय् छ्यलाः समस्या ज्यंकेमाःगु हाथ्या नं दु । थ्व हाथ्यायात पार लगे याये मफुसा नेवाःत झन झन लिउने लाइगु खतरा अप्वया वनीगु खँयात झीसं ल्वःमंके मजिउ ।

थौं नेवाःत दनावःगुलिं गर्व ताः । तर हानं द्यने मजिउ धकाः ध्वाथुइकेमाःगु दु । थौं नेवाःत सलंसः दँया उत्पीडन शोषण अन्याय अत्याचार विरुद्ध न्ह्यलं चायेकूपिं खः । उकिं आः जक हानं न्ह्य वयेकाः च्वने म्वाःलेमा धकाः कामना नं यायेमाःगु अवस्था दु ।

नेवाःत धायेबलय् बौद्धिक शैक्षिक सांस्कृतिक सामाजिक रुपं नेपाःया मेगु जात जातिसिबें तःमिपिं खःसां नं तबि देय्या राजनीति प्रशासन ख्यलय् निर्णयया तहलय् मथ्यंगु वा धाये सलंसः दँनिसें थज्याःगु अवसरं बंचित यानातःगु वा अन्याय अत्याचार उत्पीडन शोषण यानातःगुलिं हे थौं देय् बर्बाद जुयाच्वंगु खः । अझ थज्याःगु खँयात तकं मेगु जातिया मनूतय्सं वंगु नेपालमण्डल बन्दयात भाषिक आधारय् स्वायत्त राज्य दयेकूसा नेपाः कुचा जुइ धकाः अःखः व्याख्या तकं यानाहःगु न्यनेदत । सलंसः दँनिसें छथ्वः जातिया गलत व्याख्याब्राह्णबादया कारणं हे देय् बर्बादीया मू हुनि खः धकाः स्वीकार यायेगु आँट याये मफुनि । आः नेवाःत न्ह्यागु हे कारणं छप्पँ जूसां नं थीथी ख्यलय् नं ज्याझ्वःत याना यंकेमाःगु दु । खालि सडक राजनीति व बन्दया ज्याझ्वलय् जक सीमित जुइ मजिउ ।

नेवाःत शोषित पीडित जुया च्वनेमाःगु थीथी कारणत मध्ये नेवाः कर्मचारीया ल्याः म्होया लिसें उपिं थीथी राजनैतिक दलया भातृसंघ संगठनय् आवद्ध जुयाच्वंगुलिं खः । गथे थौं राजनीतिक दलतय्सं नेवाः समस्यायात ज्यंकेगु कुतः मयाः अथे हे उमि भातृ कर्मचारी संगठनतय्सं नं नेवाः कर्मचारी- तय्गु हक-हितया खँ मल्हाइगु अजू चायापुगु विषय मखु । उलि जक मखु गथे दलतय्सं गलत ज्या यानाः नेवाःतय्त थःगु भूमिइ विस्थापित यायेगु कुतः याइ अथे हे तुं उमिगु कर्मचारी संघ संस्थातय्सं नं नेवाःतय्त अधिकारं बंचित यायेगु कुतःयात अजू चायाः स्वयेमाःगु मदु ।

थौं गुगु परिस्थितिइ नेवाः नेतात थःगु भाय् स्वायत्तता आदिवासी भूमिपुत्रया म्हसीकाया निंतिं छथाय् मुनेगु ह्वःताः चूलात अथे हे नेवाः कर्मचारीया हकहित जक मखु देय्या सार्वजनिक प्रशासन राजनीतिइ जुयाच्वंगु भ्रष्टाचार अनियमिता विरुद्धय् नं छप्पँ जुइमाः । अझ व स्वयां नं तःधंगु ला थीथी ख्यलय् राजनीतिक निर्णयपाखें छगू जातिया निंतिं जक दयेकीगु नीति निर्माण विरुद्ध दनेमाःगु दु । नेवाः स्वायत्त प्रदेशया विकासया लागिं माःगु नीति निर्माणय् तिबः बीत अले देय्या नियम कानूनयात गलत व्याख्याया विरुद्धय् पलाः न्ह्याकेत नं नेवाः कर्मचारी संगठन थौंया आवश्यकता खः । थुकी नेवाः खलः मोर्चातय्सं आवश्यक सहलह ब्याकी धइगु मनंतुना ।

प्रज्ञारत्न याकः

More Stories Like this