कलाकार रामशेखरयात दिल्लागा ५ कुन्हु हनीगु

झी कलाकार रामशेखर नकःमि हना ज्याझ्वः समितिं शुक्रवाः न्हिनय् येँया नेपाः बैंक्वेटय् छगू पत्रकार सम्मेलन यात । कलाकार रामशेखर नकःमियात तःजिक हनेत पत्रकारपिन्त जानकारी बीगु ल्याखं उगु पत्रकार सम्मेलन याःगु खः ।

समितिया संयोजक राजेन्द्रमान शाक्यया सभाध्यक्षताय् जूगु उगु ज्याझ्वलय् भाजु शाक्यं रामशेखर नकःमि थेंजाःपिंं ब्यक्तिपिनिगु सम्मान राज्यं हे यायेमाःगु धयादिसें नागरिकत नं छुं नं छुं कथं दायित्वं लिचिले मजिउगु धयादिल ।

वय्कलं थ्वहे दायित्वबोधया अभिब्यक्तिकथं थःपिन्सं झी कलाकार रामशेखर नकःमि हना ज्याझ्वःपाखें नागरिक स्तरं थ्वहे वइगु दिल्लागा पञ्चमि अर्थात साउन १२ गते येँया नेपाः बैंक्वेटय् हनेत्यनागु जानकारी बियादिल । सुथसिया ८:०० ताः इलय् न्ह्याइगु उगु ज्याझ्वलय् कलाकार रामशेखरयात अभिनन्दन यायेगु नापं दांम्हिचा देछायेगु ज्याझ्वः दुगु नं जानकारी बियादिल ।

ज्याझ्वलय् रामशेखरयात कयाः जनकवि दुर्गालाल श्रेष्ठं चिनादीगु म्ये व संगीतकार राजेश हाडां लसय् हनाः हालातःगु सिडि म्येचाया नं उलेज्या जुल । उगु म्येचा भ्वँतया नमोबुद्ध एफएमपाखें झायादीम्ह नेवाः राष्ट्रिय पत्रकार दबू भ्वँतया नायः रमा कर्णजीतं उलेज्या यानाः हायेकादीगु खः ।

ज्याझ्वलय् हनाज्याझ्वः तयारी सम्बन्धि जानकारी बियादीगु खःसा दुजः रवि महर्जनं किपुली यायेत्यंगु ज्याझ्वःया बारे जानकारी बियादिल ।

समितिया सह संयोजक विजयरत्न असंबरें सुभाय् देछायादीगु उगु ज्याझ्वलय् रामशेखरया बारे विराजकाजी राजोपाध्यायं दयेकादीगु भिसिडिया छपुलु नं क्यनेज्या जूगु खः ।

झी कलाकार रामशेखर नकःमि हना ज्याझ्वः समितिपाखें पिथंगु "प्रेस विज्ञप्ति"

नेपालय् यक्व प्रतिभा दुपिं जनकलाकारपिं ल्यूने लाःगु दु । वय्कःपिन्सं कष्टकर जीवन हनेमाल । थ्व नेपाःया यथार्थ खः । ख्वपया जनकलाकार रामशेखर नकःमि नं थ्वहे झ्वलय् लानादीगु दु ।

पञ्चायतकालय् "जुजु बांलाः जनता द्यांलाः" धइगु म्ये हालाः लोकंह्वानादीम्ह रामशेखरं नेपालभाषाया ज्वःमदुगु प्रगतिशील उपन्यास "नसंफाःगु चा" च्वया: श्रेष्ठ सिरपाः नं त्याकादिल ।

नेपालभाषा साहित्य व लोकसंस्कृतिइ थःगु हे विशिष्ट विधाया रुपय् दुगु व पञ्चायती कालरात्रीया इलय् सुग्यंगु हाँस्यब्यंग्यया माध्यमया रुपय् प्रचलित जूगु ख्यालकय् वय्कलं लेखन, निर्देशन व अभिनय जक यानामदी थुकी हे दत्तचित्त जुयाः न्ह्यज्यानादिल । येँय् मुनासःया ग्वसालय् जुइगु दक्व धयाथें ख्याल कासाय् वय्कःया ख्यालः पुचलं दँय्दसं सिरपाः यंकेगु याइ ।

२०३४ सालय् वय्कःया "लाता" ख्यालः मक्यनेत ग्वसाः खलःयात अञ्चलाधिसपाखें हे दबाब वल व अन्ततः उगु ख्यालखय् दुगु ह्याउँगु ध्वाँय् क्यनेगु यानाः मञ्चन जूसा हस्तक्षेप यायेगु ख्याच्वः बीवं उकियात चीकाः जक न्ह्यब्वयेमाःगु खँ लुमंकेबहःजू । वय्कःया "धिन्ताल", "बाह्र बजे" थुज्वःगु ख्यालत अति चर्चित जुल ।

नेपाल टेलिभिजन नीस्वने धुकाः "बाह्र बजे"या छायांकन यानाः क्यनेज्या जुल, तर उकी वय्कःयात निर्देशक जुइ मब्यू । लिपा वय्कलं टेलिसिरियलय् नं ज्या यानादिल व संकिपाय् नं थःगु दुचु न्ह्यब्वयादिल ।

नेपालभाषाया टेलिसिरियल तं बैंक नेपाली भाषाया १५ गते, दलन थुज्वःगु चर्चित टेलिसिरियलय् वय्कलं अभिनय यानादिलसा नेपालभाषाया निगूगु तःधंगु पर्दाया "राजमति"इ वय्कलं जनकवि दुर्गालाल श्रेष्ठलिसे जानाः मंकाः कथं पटकथा नं च्वयादिल । वय्कलं निर्देशन यानादीगु पःखाः शर्ट फिल्म जापानय् पुरस्कृत जुल ।

समग्रताय् वय्कलं थःगु जीवन हे कला क्षेत्रय् समर्पण यानादिल । सुं बुद्धिजीवि मखसें सर्वसाधारणया रुपय् वय्कःया अभिव्यक्ति यथार्थपरक व वास्तविक सामाजिक जीवनय् आधारित जुइगु याः, गुगु खँ वय्कःया लोकप्रियताया माध्यम नं जुल ।

वय्कलं थःगु जीवनकालय् थी थी संघसंस्थापाखें सिरपाः, हनापौ मुनादीगु दु, थःगु योगदानया "रित्तो ज्याल"या रुपय् व आः ज्याथः जीवनय् उगु ज्वलंत भ्वं व धातुया चक्कातयेगु रुपये गिजये याइगु जूगु दु ।

थ्वहे विडम्बनायात विडम्बना जुइके मबीत नेपालभाषा क्षेत्रया क्रियाशील मनूत मुनाः छगू चीधंगु कुतः यानागु दु, वय्कःयात हनेत व म्हो हे जूसां सार्थक रुपय् वय्कःया योगदानया मू पुलेत ।

थुज्वःपिं ब्यक्तित्वपिनिगु सम्मान जक मखु, आधान राज्यं हे यायेमाः धइगु माग व मान्यता जिमिगु दु, अथे नं नागरिकत नं छुं नं छुं कथं थःगु दायित्वं लिचिले मज्यू । थ्वहे दायित्वबोधया अभिव्यक्ति कथं जिमिसं थुगु झी कलाकार रामशेखर नकःमि हना ज्याझ्वः समितिपाखें वइगु दिल्लागा पञ्चमि श्रावण १२ गते येँया नेपाः बैंक्वेटय् सुथसिया ८ ताः इलय् कलाकार रामशेखर नकःमिया अभिनन्दन, दांम्हिचा देछायेगु ज्याझ्वः जुइगु सगर्व जानकारी बियाच्वना । थुगु ज्याय् सकसिनं थःथःगु थासं ग्वाहालि दइगु आशा यासें छिकपिनिगु सञ्चारमाध्यमपाखें प्रचारप्रसार यानाः ग्वाहालि यानादीत नं इनाप यानाच्वना । सुभाय् ।

राजेन्द्रमान शाक्य
कजि

More Stories Like this