इलय् चुनाव जुया जक मगाः : मल्ल. के. सुन्दर
नेवाः पत्रकार राष्ट्रिय दबूया ग्वासलय् निक्वःगु संविधानसभा निर्वाचन व नेवाः सरोकार विषयस नेवाः स्वायत्त राज्य मंकाः संघर्ष समिति नाप अन्तरक्रिया ज्याझ्वः जुल ।
यलया अक्षेश्वरमहाविहारय् जूगु उगु ज्याझ्वलय् मंकाः संघर्ष समितिया सचिवालय् कजि मल्ल के. सुन्दरं इलय् चुनाव जुया जक मगाःगु धयादिसें उकीं उत्पीडित जनताया माग सम्बोधन जुइ कथंया सविधान नं पिथना माःगु खँ कनादिल ।
अथेहे मल्लं नेवाःतय् मंका सघर्षया प्रमुख राजनीतिक सरोकारया मुद्दा धाइगु नेपालया विभेदकारी पक्षपाती बैहिष्करणवादी व गैरसमावेशी राज्य सत्तायात हिकाः पूर्ण रूपं पुनःसंरचना जुइमाःगु अले समावेशी व सहमतिया चरित्रय् राज्य सत्ता जुइमाःगु धयादिल । वय्कलं केन्द्रीकृत राज्य सत्ताया अन्त्य यासें विकेन्द्रित जुइमाःगु खँ तयादिल ।
थुगु इलय् मू कथं नेवाःतय्गु सरोकारया मुद्दा धाइगु निर्वाचन प्राणाली समावेशी चरित्र कथं जुइमाःगु, राज्य संरचनाय् समावेशी कथं जुइमाःगु व न्हूगु राज्य सत्ता नीस्वनेवलय् नेवाः समुदाय सार्वभौमसत्ता सम्पन्न जूगु खः वा मखु धाइगु प्रमाणीकरण नं जुइमाःगु खँ धयादिल ।
ज्याझ्वःयात सम्बोधन यायेगु झ्वलय् मंकाः सघर्ष समितिया नायः सुजिव बज्राचार्यं पहिचान पक्षधर छथ्या च्वना चुनाबी तालमेल यानाः जक उम्मेदवारी बिइमाःगु खँ धायादिल ।
मंका सघर्ष समितिया नायः सुजिब बज्राचार्यया नायसुइ न्ह्याःगु उगु ज्याझ्वः नेवाः पत्रकार दबूया राजेन्द्र शाक्यं न्ह्याकादिगु खः । नापं उगु ज्याझ्वलय् मंकाः सघर्ष समितिया थीथी व्यक्तित्वया ब्वति दुगू खः ।
