येँय् ३५ गू किलो लुँ बरामद
येँया कोटेश्वरय् प्रहरीं बुधवाः सुथय् ३५ गू किलो लुँ बरामद याःगु दु । चीनया खासां अवैध कथं हःगु उगु लुँ सुराकीया आधारय् प्रहरीया केन्द्रीय अनुसन्धान ब्यूरोया पुचलं बा ३ ख २५७० ल्याःया कन्टेनरपाखें लुँ बरामद याःगु खः ।
कन्टेनरया न्ह्यःनेया ब्वय् फल्स बटन दयेकाः सुचुकाहःगु अवस्थाय् छगू छगू किलोया ३५ कूचा लुँ बरामद याःगु ब्यूरोया निर्देशक प्रहरी नायब महानिरीक्षक प्रकाश अर्यालं जानकारी बियादीगु दु । बुधवाःया लुँया भाः कथं उगु बरामद याःगु लुँ १५ गू निसें १७ गू कोटी तका थ्यंगु नं धाःगु दु । कन्टेनरपाखें पिने देशया मुद्रा लिसें १६ द्वः व ७ सः तका धेबा नं बरामद याःगु प्रहरीं न्ह्यथंगु दु ।
प्रहरीं अवैध लुँ ओसारपसारय् दुथ्याःपिं सिन्धुपाल्चोक तातोपानी ४ या गाडी चालक निमा छिरिंग तामांग, गाडी थुवाः तातोपानीया हे नांगेल धइम्ह ओम बहादुर बज्राचार्य, येँ महानगरपालिकाया ६ या ग्याम्जो लामा व सुनसरी धरानया मोहनकुमार अग्रवालयात ज्वंगु दु ।
लुँया तस्करी आपालं पुचः व थी थी तगिंया मनूतय्गु संलग्नता दयेफइगु प्रहरीया अनुमान दु ।
