आत्मसमर्पणया हुनिं देश कमजोर जूगु
राष्ट्रिय जनमोर्चाया नायः चित्र बहादुर के.सीं चाकडी व दलाली यानाः भविष्य सुरक्षित जुइ धइगु मान्यतां नेतात भारतीय विदेशमन्त्री नापलाःवंगु धयादीगु दु ।
बुधवाः येँय् ग्वसाः ग्वःगु छगू ज्याझ्वलय् न्ववानादिसें नेता के.सीं उकथं द्वपं बियादीगु खः । वय्कलं दार्चुला खुसिवालं चुइकूगु इलय् सु नं मवंगु तर भारतीय विदेशमन्त्री सलमान खुर्सिद वःगु इलय् फुक्क नेतात लाइन च्वनावन धयादिसें फुक्क ज्या भारतं याइगु खःसा जिमिसं नेपाली जनताया नितिं ज्या यानाबी धकाः छाय् ध्वंलायेगु धकाः न्ह्यसः नं तयादिल । थजाःगु हे आत्मसमर्पणवादया हुनिं देशया राष्ट्रियता न्हियांन्हिथं कमजोर जुजुं वनाच्वंगु नायः के.सी.या धापू खः ।
नायः के.सीं प्यंगू दलं गोलमेच सम्मेलन व समानुपातिक अप्वयेकेगु क्वःछिउगु व जःलाखःला देय् चीन व भारतं चुनाव यायेगु सल्लाह बिउगुलिं मंसीरय् चुनाव जुइगु नं दावी यानादिल ।
थ्वहे झ्वलय् नेता के.सीं चुनाव याके मबियाः नेकपा माओवादी वैद्य समूह मत्याइगु नं धयादीगु दु ।
