बुद्ध मुर्ति पलिस्था यायेत बालुवाटारय् प्रदर्शन
सुर्खेतया काँक्रे विहारय् बुद्ध मूर्ति तयेके मबिउगु खँयात कयाः प्रहरी प्रशासनं दमन याःगु विरोधय् बुधवाः सुथय् बौद्धमार्गीतसें प्रधानमन्त्रीया सरकारी निवास बालुवाटारय् प्रदर्शन याःगु दु । काँक्रे विहारया घटनायात कयाः विरोधय् कुहांवःपिं प्रदर्शनकारीतसें फुक्क बौद्ध छप्पँ जुइनु, बुद्ध बूगु देशय् बुद्धया अपमान बन्द याः, धार्मिक विभेदया अन्त याः लिसेंया नारा थ्वयेकूसें बालुवाटारय् प्रदर्शन याःगु खः ।
उगु घटनाया विषयस मंगलवाःनिसें सरकारया विरोधय् कुहांवःपिं प्रदर्शनकारीतसें न्यागू बुँदाया माग तःगु दु । वय्कःपिन्सं बौद्धमार्गीतय्त प्रहरी प्रशासनं याःगु ज्यादति विरुद्धय् सार्वजनिक कथं स्थानीय स्तरय् हे प्रहरी प्रशासनं माफी फ्वनेमाःगु, बौद्ध धर्मालम्बीतय्गु आस्थाया केन्द्र गोम्पा, विहार, चैत्य, मूर्ति आदि दुगु लागाय् बौद्धमार्गीतय्त दुव्र्यवहार मजुइगु खँय् सरकारपाखें ग्यारेन्टी बीमाःगु, काँक्रेविहार व्यवस्थापनया नितिं सरकारपाखें उचित बजेटया व्यवस्था यायेमाःगु व आस्थाया केन्द्रय् बौद्धमार्गीतसें निर्वाध व शान्तिपूर्वक पाठ पूजा यायेदयेमाःगु नापं उमिगु शान्ति सुरक्षाया ग्यारेन्टी सरकारं यायेमाःगु दुथ्यानाच्वंगु दु ।
थ्वस्वयां न्ह्यः बुद्धया मूर्ति १५ न्हू दुने काँक्रेविहारय् पलिस्था यायेत अन्तरिम मन्त्रीपरिषदया नायः खिलराज रेग्मीयात ज्ञापन पौ लःल्हायेधुंकूगु खः ।
बुद्ध जयन्तीया झ्वलय् बुद्धया मूर्ति स्थानीय बौद्धमार्गीतसें सुर्खेत जिल्लाया लाटीकोइली गाविस ८ य् च्वंगु काँक्रे विहारय् पलिस्था यायेत स्वःगु इलये प्रहरी प्रशासनं हस्तक्षेप याःगु खः । थ्वहे विरोधय् बुधवाः सुथसिया ९ ताः इलंनिसें ११ ताः ईतक बालुवाटारय् शान्तिपूर्ण प्रदर्शन याःगु खः । कन्हय् विहिवाः नं वहे इलय् बालुवाटार घेराउ यायेगु ज्याझ्वः तयातःगु दु ।
ज्याझ्वलय् नेपाल बौद्ध महासंघ, नेपाल आदिवासी जनजाति महासंघ, राष्ट्रिय आदिवासी जनजाति महिला महासंघ, अखिल भिक्षु महासंघ, नेपाल परम्परागत बौद्ध धर्म संघ व धर्मोदय सभा लिसें थी थी संघसंस्थां प्रदर्शन याःगु खः ।
