परिक्षां अस्पतालया आइसियू प्रभावित
नारायणी उपक्षेत्रीय अस्पतालया संघन उपचार कक्ष (आइसियू) सेवा निन्हुन्हयः निसें बन्द जुयाच्वंगु दु । लोकसेवा आयोगया परीक्षाया नितिं चिकित्सक बिदाय् च्वंगुलिं सेवा बन्द यायेमाःगु अस्पताल व्यवस्थापन पक्षं न्ह्यथंगु दु ।
आइसियू विभागया प्रमुख डा. अरुण कुमार झां मेडिकल अधिकृतत बिदाय् च्वनाच्वंगुलिं ल्वगितय्त भर्ना मयायेत उजं बियादीगु दु ।
आइसियू सेवा बन्द जुयाः पर्सा, बारा, रौटहट, सर्लाही व भारतया सीमालिसे स्वानाच्वंगु गामं वइपिं गम्भिर अवस्थाया ल्वगित निजि अस्पतालय् तसकं थिकेक ल्हापं पुलाः वासः यायेत बाध्य जुयाच्वंगु दु ।
गम्भिर अवस्थाया ल्वगित भर्ना मयाःसां नं आइसियू वार्डय् बेडय् स्वम्ह सामान्य अवस्थाया ल्वगित धाःसा भर्ना यानातःगु दु ।
थुखे अस्पतालया निमित्त मेडिकल सुपरिटेन्डेन्ट डा. रबिन्द्र ठाकुरं आइसियू सेवा बन्द जूगुया बारे थःत जानकारी मदुगु धयादीगु दु । वय्कलं थौंकन्हय् फूकथं सेवा बियाच्वनागु तर ६ न्हु लिपा मेमेगु सेवा नं प्रभावित जुइगु सम्भावना दुगु धयादिल । डा. ठाकुरया कथं लोकसेवा आयोगया परिक्षाय् सहभागी जुइ ल्यंदुपिं चिकित्सकत विदाय् च्वनेगु तयारी यानाच्वंगु खः ।
दरबन्दी कथं चिकित्सकत नियुक्त मजूगुलिं अधिकांश चिकित्सक अस्पताल विकास समितिपाखें करार र अस्थायी दरबन्दीइ नियुक्त जुयाच्वंगुलिं आः उपिं चिकित्सकत मंकाः कथं बिदा च्वंगुलिं समस्या जूगु खः ।
लोक सेवा आयोगया परीक्षाय् ताःलाःसा सरकारी जागिर लिसें स्थायीत्वया ह्वःताः दइगुलिं चिकित्सकत तयारीया परीक्षाया तयारीइ व्यस्त जुयाच्वंगु दु ।
