शील ग्रहण धइगु आचरणं क्यनी प्रार्थनां मखु

लोकबहादुर शाक्य

मूर्ति पुज्याइपिनि स्वार्थ पहः

अप्वः मनूत ईश्वरवादी जूगुलिं थीथी देवदवीपिंत पूजा यानाच्वनी । गुलिसिनं थःगु स्वार्थया निंतिं पशुपंक्षी बली बियाच्वनीगु जुल । तर द्यःयात हिं छ्वाकाः फोहर यानाः दुगुचा खा हँय् आदि बली बिउपिं छेँय् यंकाः नयेगु याइ । मनूया ख्वालय् भुजिं छम्ह वल कि सहयाये मफयाः ख्याना छ्वइ । तर हिभ्याः दुगु द्यःया ख्वालय् भुजिंत मुनाः फोहोर जुयाच्वंसां चिउताः मदु । अनेक प्रकारया भय आपत विपत जुइबलय् द्यःया शरणय् वनाः पूजा याईपिं मनूत दु । थज्याःगु शरणपाखें दुःख मुक्त जुइ मखु । थःहे मुक्त मजूसा मेपिनिगु दुःख मदयेकेगु सम्भव मदु । थुगु हे कथं थम्हं हे लँ मसिउसा मेपिंत लँ क्यने फइ मखु । लोभमोह दुपिं व्यक्ति वा द्यःपिनिगु शरणय् वनाः तरे जुइ मखु । थःम्हेसिनं हे बिचाः यायेगु क्षँमता माः । मेपिंसं धायेवं पत्याः याये मजिउ । खः मखु थःगु बुद्धिं हे चिन्तन मनन यायेमाःगुजुल ।


मत दुम्हेस्यां जक लँपु क्यने फइ

डा. अनोजा गुरुमांया 'शान्ति अभिप्रेरणा' सफुली न्ह्यथनातः कथं भय व दःख मदुम्ह नापं मेपिंत नं वपाखें मुक्त यायेत लँपु क्यना बीम्हेसिगु शरणय् वनेमाःगु जुल । प्राणीपिनि बुरा बाज्या धायेबहम्ह बुद्ध राग द्वेष मोह आदि शत्रुयात त्याका बिज्याये धुंकूम्ह देव मनुष्य सकलसिनं पूजा याये योग्यम्ह गुगुं नं प्रकारया गुप्त पाप मयाइम्ह चतुरार्य सत्ययात यथार्थ रुपं वोध यानाः लोकजनिपंत थुइकेत सक्षँम जुयाबिज्याःम्ह धर्म तथा आचरणं पूर्ण जुयाबिज्याःम्ह सुमार्गय् गमनागमन याना बिज्यायेधुंकूम्ह मरण रहित जुयाः उत्तम शान्ति जुयाच्वंगु निर्वाणया लँपुइ गमन जुयाबिज्यायेधुंकूम्ह देव मनू व प्राणीपिंत सभ्य जुइ कथं ज्ञानपाखें दमन याइम्ह सारथि जूम्ह खिउँपाखें तुइसेच्वंगु ज्ञानरुपी संसारया दुःख व भयं मुक्त जुया बिज्याःम्ह जूगुलिं शास्ताया शरणय् वने फत कि थुगु लँपुइ न्ह्यज्यायेफइ । खिउँपाखें पार जुयाः भय तथा दुःखं मुक्त जुयाः शान्तिपूर्ण निर्वाण सुख काये फइगु जुल ।


संघ गतिलाःसा धर्म गति काइ

धर्मया शरणय् वनकि प्रज्ञावान जुइ फइगु जुल । निर्दोष कुशल तथा शुद्ध चित्तया स्वभावयात धर्म धयातल । सच्चा धर्म धइगु आदि मध्य व अन्त्य तक नं कल्याण जुइगु मार्ग फल प्राप्त जुइगु पद्धति खः । नेपालय् मेपिंत दुःख बीगु स्यायेगु बली बीगु खुइगु कर्तव्य पूरा मयाइम्हं द्यःयात लड्डु नकाः थःगु इच्छा मनोकामना पूरा जुइ भाःपीगु अनेक प्रकारया 'धर्म' खनेदु । यथार्थ रुपं ध्वाथुइके माःगु ला शुद्ध प्रज्ञायुक्त धर्म धारणा यानाः सफल मनुष्य जीवन हनेमाःगु जुल । शुद्ध संघया शरणय् वन कि भौतिक व आध्यात्मिक उन्नति जुइ । मार्ग व फलया अध्ययन तथा अनुशरण याइगु संस्थायात संघ धयातल । संघ बुँ समान खः । बुँइ पुसा पित कि फल सइ । भय व सन्तापया कारणं दुःख जुयाच्वनी । बुद्धया उपदेश कथ धर्म -विनय-शीलय् प्रतिष्ठित जुयाच्वगु संघया शरणय् वनेगु ल्वमंके मजिल । उकिं च्वय् न्ह्यथनातःगु कथं त्रिरत्न रुपी बुद्ध धर्म संघया शरणय् वनेमाःगु जुल ।


त्रिरत्न धइगु ब्वनाः ल्वमंकेगु मखु

बुद्ध धर्मया अप्वः धइथे ज्याझ्वलय् बुद्धम् शरणम् गच्छामि धम्मम् शरणम् गच्छामि संघम् शरणम् गच्छामि ब्वने सःपिं मनूत आपालं दःसां थुकिया धाथेंगु अर्थ थूपिं म्हो जक खनेदु । म्हुतुं जक धयां मगाः च्वय् न्ह्यथनातः कथं ज्या यानाः मन-वचन व सरिल नापं शरण वनाः बुद्धया उपदेश थुइकाः पालन यायेगु आवश्यक दु ।


सुधार समितिया ज्या स्तुत्य

थुगुसी यलय् टंगल टोल सुधार समितिया ग्वसालय् बद्ध जयन्ती तःजिक जुल । त्वाःया दक्व जातिया प्रतिनिधिपिं दुथ्याकाः २४४३ क्वःगु बद्ध जयन्ती समारोह समिति स्वनातःगु पाय्छि जू । स्वांयापुन्हि कुन्हु पाःब्व लःल्हाःगु समारोहस समितिया छ्यान्जे दुर्गामान श्रेष्ठजुं 'भगवान बुद्धयात जाकि ह्वलाः छायेगु, पुजा यायेगु ज्या बुद्धोपदेशया अःखः खनेदु । बरु पंचशील पालन यायेमाल ।' धकाः न्ववानादीगु सराहनीय जुल । लसकस यानादीम्ह नेमरत्न बज्राचार्यजु दँय् छकः जक बुद्ध जयन्ती माने यायेगुली सीमित मजुसे न्ह्यखुन्हुया बौद्ध सभाय् अन्तर्राष्ट्रिय ध्यान केन्द्रया अध्यक्षँ हेमबहादुरया प्रवचन कथं बुद्धया उपदेश थुइकाः चर्या यानाः ध्यान च्वनाः जीवन सुधार यायेगुपाखे नं न्ह्यज्याये माल धकाः सुझाव बियादीगु च्वछायेबह जू । दांभरिया प्रतिवेदनय् ललितपुर बुद्ध जयन्ती कोष पाखे दां ३० द्वः तका जक अनुदान वगु तर प्यंगू लाखं मल्याक खर्च जुल धाःगु न्यने दत । पाःब्व लःल्हायेगु झ्वलय् १२ इन्चीया लुं सियातःम्ह बुद्ध मूर्ति नं न्ह्याकेगु व्यवस्था यानाः शाक्य व बज्राचार्यिपं जक दुथ्याःगु ल।पु। बुद्ध जयन्ती कोषयात न्ह्यइपुक लःल्हाःम्ह तंगःत्वाः सुधार समिति धन्यवादया पात्र खः ।


आमिश पुजा सिबे उत्तम प्रतिपत्ति पुजा

बुद्ध थः महापरिनिर्वाण जुइ न्ह्यः भिक्षु आनन्द स्थविरयात 'तथागत निर्वाण जुइ धुंकाः उपदेश बीम्ह गुरु तथा शास्ता दइमखुत धकाः भाःपी मजिउ । जिं गुगु धर्म-विनय-शील देशना यानाः प्रज्ञप्ति यानागु खः व हे शास्ता जुइगु जुल । स्वां-मरिचरि-फलफुल -नैवैद्य आदि अर्पण यानाः आमिश पूजा यायेगुपाखे सिबें नं धर्म-विनय-शील आदि न्यनाः थुइकाः व्यवहारय् छ्यलाः थःथः दुने मैत्री-करुणा-मुदिता-उपेक्षु भावना ब्वलंकाः उपदेश कथं ज्या याःम्हेसिनं बुद्धयात पूजा याःगु जुइ' धकाः आज्ञा दयेकाबिज्याःगु खँयात सकस्यां अनुशरण याये मालाच्वंगु दु । थ्व सारगर्भित सिद्धान्तयात सकस्यां चिन्तन मनन् यानाः थुइकाः चर्या याये फःसा जक त्रिरत्नया शरणय् वनागु सिद्ध जुल ।

अस्तु ।

More Stories Like this