७७ दँ लिपा बेलायती कासामियात "विम्बल्डन"

बेलायती कासामि एण्डी मुर्रें विम्बल्डन उपाधि त्याकूगु दु । आइतवाः बहनि जूगु कासाय् शीर्ष बरियताया नोभाक जोकोभिकयात बुकाः ७७ दँ लिपा न्हापांखुसी विम्बल्डन टेनिस त्याकूम्ह न्हापाम्ह बेलायती कासामि जूगु दु ।

सेन्टर कोर्टय् जूगु कासाय् उत्कृष्ट कासा न्ह्यःब्वसें विश्व नं २ कासामि मुर्रें न्हापांगु सेट ६-४ ल्याखं त्याकूगु खः । निगुगू सेटय् सर्वियन कासामि जोकोभिक लिहांवयेगु कुतःया झ्वलय् कडा चुनौति बिउगु खःसां नं मुर्रें ७-५ या ल्याखं थःगु पक्षय् लाकल । स्वंगूगु सेटय् अपेक्षा अःखः बांमलाक्क प्रदर्शन याःम्ह जोकोभिकयात ६-४ या ल्याखं बुकुसें उपाधि थःगु पक्षय् लाकल । साविक विजेता जोकोभिकयात बुकेत मुर्रेयात ३ घौ व १० गू मिनेट ई फुकूगु खः ।

कासाया झ्वलय् मुर्रेयात हःपाः बीगु नितिं बेलायती प्रधानमन्त्री डेभिड क्यामरुन नं सेन्टर कोर्टय् उपस्थित जुयादीगु खः ।

लुमंकेबहःजू, सन् १९३६ य् बेलायती फ्रेड पेरीं जर्मन कासामि गोटफ्राइडयात बुकूसें उगु उपाधि त्याकेधुंकाः सु नं बेलायती कासामिं थुगु उपाधि त्याकेमफूगु खः ।

More Stories Like this