"जि सतः मखु" उपन्यास पिदन
किपुलिं पिहांवइगु खस भाषाया वाःपौ "कीर्तिपुर सन्देश"या १०० गू ल्याः व उपन्यासकार नजरराम महर्जनया गुंगूगु उपन्यास "जि सतः मखु" छगू ज्याझ्वःया दथुइ शुक्रवाः विमोचन जुल ।
उपन्यासकार नापं कीर्तिपुर सन्देश वाःपौया प्रकाशक नजरराम महर्जनया सभाध्यक्षताय् जूगु उगु ज्याझ्वलय् संस्कृतविद् सत्यमोहन जोशीं उपन्यास "जि सतः मखु" व संघीय समाजवादी पार्टीया मूछ्याञ्जे राजेन्द्र श्रेष्ठं पत्रिका विमोचन यानादीगु खः ।
ज्याझ्वलय् मूपाहां जोशीं साहित्य सृजना यायेगु ज्या नेवाःतय्सं थःगु मांभासं यायेमाः धयादिसें मांभासं साहित्य सृजना याःसां नं अन्तराष्ट्रिय स्तरय् सिरपाः त्याकेफइ धयादिल ।
संघीय समाजवादी पार्टीया मूछ्याञ्जे श्रेष्ठं आःया अवस्थाय् संघीयता, गणतन्त्र, धर्म निरपेक्षता नापं पहिचान पक्षधरत छप्पँ जुयाः वनेमाः धयादिसें सञ्चार ख्यलं नं सामाजिक दायित्व ल्वमंके मजिउगु धयादिल ।
"कीर्तिपुर सन्देश"या सम्पादक श्रीकृष्ण महर्जनं लसकुस यानादिसें आः तक नं नेवाःत पहिचानया नितिं मिसन पत्रकारीता यानाच्वनेमाःगु नापं "कीर्तिपुर सन्देश" पहिचानया सवालयात कयाः ईया माग कथं पिथनागु पत्रिका खः धयादिल ।
ज्याझ्वलय् नेपालभाषा एकेदमिया भाइस चान्सलर नापं बाखंच्वमि लक्ष्मण राजबंशीं जि सतः मखु उपन्यासया समीक्षा यानादीगु खःसा उपन्यास पिथनेत माःगु ग्वाहालि यानादीम्ह दुर्कमान महर्जनयात हनापौ लःल्हानःगु खः । नापं कीर्तिपुर सन्देश वाःपौया स्तम्भकार, च्वमि नापं विज्ञापनदातापिन्त नं हनापौ लःल्हाःगु खः । (सन्ध्या टाइम्स)
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
