बार्टोली बिम्बल्डनया न्हूम्ह च्याम्पियन

वर्षया स्वंगूगु व दकलय् अप्वः धनराशी दुगु विम्बल्डन टेनिसया मिसापाखे फ्रेन्च कासामि मारियोन बार्टोली न्हूम्ह च्याम्पियन जूगु दु ।

मिसापाखें उपाधिया नितिं शनिवाः जूगु कासाय् १५ गूगु बरियताया बार्टोलिं २३ गूगु बरियताया जर्मन कासामि सबिनि लिसिकीयात बुकाः न्हापांखुसी टेनिस जगतय् प्रतिष्ठित न्हापांगु ग्राण्डस्लाम उपाधि त्याकूगु खः ।

बार्टोलिं ६-१ व ६-४ या सेटं याउँक बुकाः उपाधि थःगु नामय् याःगु खः । बार्टोलीया थ्व निक्वःगु विम्बल्डन फाइनल खः । सन् २००७ य् बार्टोली अमेरिकी कासामि भेनस विलियम्सपाखें पराजित जूगु खः ।

शीर्ष बरियताया अमेरिकी कासामि सेरेना विलियम्सयात बुकूगु इलंनिसें फाइनल प्रतिस्पर्धी लिसिकीं सनसनीपूर्ण प्रदर्शन यानावयाच्वंगु खःसा उपाधिया दावेदार कथं नं कयातःगु खः । अथेखःसां फाइनलय् धाःसा बार्टोली न्ह्यःने न्ह्यथनेबहः कथं प्रदर्शन यायेमफुत ।

न्हापांगु सेटयय् याउँक बूसा नं निगूगु सेटय् लिहांवइगु आशा याःगु खः । तर लिसिकी ताःलाये मफुत । लिसिकीया थ्व छुं नं ग्राण्डस्लाम टेनिसया न्हापांखुसी फाइनलय् थ्यंगु खः ।

More Stories Like this