इजिप्टय् "कू", मोर्सी सेनाया हिरासतय्

इजिप्टया सेनां देशया संविधान निलम्बनया घोषणा यासें राष्ट्रपति मोहम्मद मोर्सीयात पदं चीकूगु दु ।

सेना प्रमुख अब्दुल फत्तह अल सिसीं टेलिभिजनपाखें सम्बोधन यासें संवैधानिक अदालतया मुख्य न्यायधिस अदली मन्सुरं न्हूम्ह राष्ट्रपतिया चुनाव मजूतले सत्ता कायेगु घोषणा याःगु दु । देशया संकट ज्यंकेत वा सैन्य हस्तक्षेप नितिं तयार जुइत धयादिसें राष्ट्रपतियात बिउगु ४८ घौया अल्टिमेटम क्वचायेवं सेनां उकथं पलाः ल्ह्वंगु खः ।

थःगु सम्बोधनय् सेना प्रमुख सिसीं राष्ट्रपति मोर्सी इजिप्टया नागरिकया माग पूवंकेत ताःमलाःगु धासें देशया बहुमतया आह्वान विरुद्ध सेना म्हुतु व मिखा बन्द याना च्वनेमफइगु जूगुलिं हस्तक्षेत यायेमाःगु धयादिल ।

सेनां राष्ट्रपति मोर्सीया नापनापं वय्कःया फ्रिडम एण्ड जस्टिस पार्टीया शीर्ष नेतायात बन्दी याःगु दु ।
सेना प्रमुखया सम्बोधन लिपा मुस्लिम ब्रदरहुडया स्वामित्वय् दुगु टेलिभिजन बन्द याकूगु व मिश्र ट्वान्टीफाइभ च्यानलया व्यवस्थापकयात नं ज्वंगु अन्तराष्ट्रिय सञ्चारमाध्यमं न्ह्यथंगु दु ।

सुरक्षा फौजं अल जजिराया इजिप्ट टेलिभिजन च्यानल मुबासेर मिश्रय् छापा मारेयाःगु नापं आपालं ज्यामितय्त ज्वंगु दु । राष्ट्रपति मोर्सीं सेनाया पलाःयात सैन्य कू धकाः कुंखिउगु दु ।

मोर्सीया राजीनामाया माग याना वयाच्वंपिं प्रदर्शनकारीतसें लसता प्वंकूगु दुसा समर्थकतय्सं विरोधी व सेनाया न्ह्यःने क्वमछुइगु धाःगु दु । सेनां राजधानी कायरो नियन्त्रणय् काःगु दु ।

More Stories Like this