लोक सेवा आयोगय् जनजाति महासंघं ज्ञापन पौ लः ल्हात
आदिवासी जनजाति महासंघं मंगलवाः लोक सेवा आयोगं जिल्ला प्रशासन ज्याकुथिया सिफारीस पौ माःगु बिरुद्ध ६ बुँदा माग तया ज्ञापन पौ लः ल्हागु दु ।
आदिवासी जनजातितय्गु छगु जक सरकारी निकाय प्रतिष्ठानया ऐन कथं याःगु सिफारिसयात लोक सेवा आयोगं मान्यता मबुइसें जिल्ला प्रशासन ज्याकुथिया सिफारीस अनिवार्य हयेमाःगु प्रावधान नं यानाः आदिवासी जनजातितय्सं म्वामदुगु दुःख फयेमाःगुलिइ थुगु प्रावधान चिकेमाःगु माग यासें ज्ञापन पौ लः ल्हागु खः । नापं आदिवासी जनजाति उत्थान राष्ट्रिय प्रतिष्ठनं नापं थुगु विषयस कया २०६९-०५-१२ गते आयोतयात ईनाप तक याये धुंकाः नं थःगु तक नं कार्यान्वयन मजुगूलिइ ध्यानाकर्षण यायेगु ज्या तक जुगू खः । छु नं मनू आदिवासी जनजाति खः या मखु धाइगु निर्णय यायेगु ज्या नेपाल आदिवासी जनजाति महासंघयागु खः जिल्ला प्रशासन ज्याकुया मखु धाःगु दु ।
नापं नेपाल अन्तरिम संविधानं राज्यया आर्थिक, सामाजिक, व शैक्षिक कथं लिउने लाकाःतपिं आदिवासी जनजाति व मे मेपिं उत्पीडित जाति व वर्ग समुदाययात समानुपातिक समावेशी सिद्धान्तया आधारय् राज्य संरचनालय् सहभागिता व प्रतिनिधित्व जुइ दइगु संवैधानिक अधिकार कायेगु निंति व संवैधानिक दायित्वयात कार्यन्वयन याकेगु निंति ज्ञापन पौ लः ल्हायेमाःगु खँ नं धाःगु दु ।
माग थुकथं दु
१ जिल्ला प्रशासन ज्याकुया सिफारीस सरह आदिवासी जनजाति उत्यान राष्ट्रिय प्रतिष्ठान ऐन कथं प्रतिष्ठानं याःगु सिफारीसयात मान्यता बिइमाःगु ।
२ लोक सेवा आयोग समावेशी जुइमाःगु ।
३ राज्य संचालनया दक्व निकाय व संस्थानया निंति लोक सेवा आयोगं कायेगु परीक्षा प्रक्रियालय् समावेशी कोटा क्वछिमाःगु ।
४ आदिवासी जनजाति महासंघया दुजः जातीय संगठनत व महासंघया जिल्ला संगठन नेपाल आदिवासी जनजाति महासंघ जिल्ला समन्वय परिषदतय्गु सिफारिसयात नं मान्यता बिइमाःगु ।
५ आयोगया निर्देशिका परिमार्जन यानाः आदिवासी जनजाति उत्थान राष्ट्रिय प्रतिष्ठानया सिफारिसयात मान्यता बिइगु कथं दक्व जिल्ला व निकायलय् परिपत्र यायेमाःगु ।
६ लोक सेवा आयोगय् आदिवासी जनजातितय्सं प्रशासनिक अभिरुची परिक्षण (प्रारम्भिक परीक्षा) बियमाःगु न्हूगु व्यवस्था तुरुन्त खारेज यायेमाःगु ।
किपा:- आङ्ग काजि सेर्पा
