चिकित्सकत बच्छि स्वयां अप्वः ई अस्पताल पिने
सरकारी अस्पताल व प्राथमिक स्वास्थ्य केन्द्रय् ज्या यानाच्वंपिं चिकित्सकतसें क्वःछिनातःगु इलये ज्या मयायेवं ल्वगित मर्काय् लाःगु दु ।
सरकारी नियम कथं चिकित्सकतसें वालय् ४० घौ ज्या यायेमाःगु जूसां भरतपुर अस्पतालये सुं सुं चिकित्सक बाहेक अप्वः धइथें चिकित्सकत क्वःछिनातःगु स्वयां बच्छि ई जक अस्पतालय् च्वनाः ज्या याःगु सीदुगु दु ।
सुथसिया १० ताः इलय् अस्पताल थ्यनीपिं चिकित्सकत न्हिनसिया २ ताः मजूनिबलय् नीजि अस्पताल थ्यने धुंकी । सुथजःछि नीजि अस्पतालय् ब्यस्त जुयाच्वनीपिं चिकित्सकत नयेगु तकं अस्पतालया इलय् नइगु मेडिकल सुपरिटेण्डेन्ट डा. महेन्द्रराज न्यौपानें धयादीगु दु ।
न्हिनय् १२ ताः इलय् नयेगु नितिं पिहांवनीपिं चिकित्सक नीजि अस्पताल वनाः ज्या याःवंगु सीवं २० म्ह स्वयां अप्वः चिकित्सकतय्त मौखिक रुपं सचेत याकागु डा. न्यौपानेया धापू दु ।
नेपाल चिकित्सक संघ चितवनया नायः डा. कृष्ण पौडेलं सरकारी नियम कथं चिकित्सकं ज्या यायेमाःगु व थःगु कर्तब्य पूमवंकूपिं चिकित्सकतय्त कारवाही यायेमाःगु धयादीगु दु ।
ज्याकू प्रमुख जुयाच्वंपिं चिकित्सकया नितिं न्हिनय् २ ताः लिपा प्रशासनिक ज्याया नितिं ई फ्यानातःगुलिं उकियात मखुगु कथं ब्याख्या यानाः चिकित्सकत न्हिनय् २ ताः ई मजुइवं पिहांवंगु खनेदु ।
पश्चिमाञ्चल क्षेत्रीय स्वास्थ्य निर्देशनालय हेटौंडाया निर्देशक डा. श्यामराज उप्रेति सरकारी नियम कथं चिकित्सकतसें वालय् ४० घौ ज्या यायेमाःगु धयादी । अस्पतालं चिकित्सकया ज्याया ई धलः सर्वसाधारणं सकस्यां खनेदइकथं तयेमाःगु तकं निर्देशक उप्रेतिं धयादीगु दु ।
भरतपुर अस्पतालय् थौं कन्हय् ६६ म्ह चिकित्सकत ज्या यानाच्वंगु दु । (रासस)
