"कन्फेडेरेशन कप"या उपाधि ब्राजिलयात

ब्राजिलय् न्ह्यानाच्वंगु "कन्फेडेरेशन कप फुटबल"या उपाधि घरेलु टोली ब्राजिलं त्याकूगु दु ।

रियो द जेनेरियोय् च्वंगु माराकान रंगशालाये जूगु कासाय् न्याक्वः तकया विश्व विजेता ब्राजिलं बिश्व च्याम्पियन नापं यूरोपियन च्याम्पियन स्पेनयात स्वंगू गोलं बुकाः उगु उपाधि त्याकूगु खः । थ्वनापं लगातार स्वक्वः खुसी कन्फेडेरेशन कपया उपाधि त्याकूगु ब्राजिलं समग्रय् प्यक्वः तक थुगु उपाधि त्याकूगु खः ।

कासाय् फ्रेडं निगू व नेयमारं छगू गोल याःगु खः । कासाया ६८ गूगु मिनेटय् जेरार्ड पिकें ह्याउँगु कार्ड नयेवं स्पेन १० म्ह कासामी सीमित जूगु खः ।

अ‍ेथेहे स्वंगूगु थाय्या नितिं जूगु कासाय् इटालीं उरुग्वेयात बुकूगु दु । इटालीं उरुग्वेयात पेनाल्टी सुट आउटय् निगूया विरुद्ध स्वंगू गोलं बुकल । क्वःछीनातःगु इलय् निखेरं निगू निगू गोल जूगु खः ।

थ्वहे झ्वलय् फुटबलया उदयीमान कासामि नेयमार कन्फेडेरेशन कप फुटबलया सर्वोत्कृष्ट कासामि घोषित जूगु दु । थ्व उपाधि नापनापं सिरपाः कथं "गोल्डेन बल" प्राप्त याःगु दु । अथेहे स्पेनया आन्द्रेइ इनिष्टां "सिल्भर बल" प्राप्त याःगु दुसा ब्राजिलया हे पाउलिन्होयात "ब्रोन्ज बल" बिउगु दु ।

थ्वहे झ्वलय् कासाया सर्वाधिक गोलकर्ता स्पेनया स्ट्राइकर फर्नान्डो टोरेसं "गोल्डेन बुट" त्याकूगु दु । वय्कलं मुक्कं न्यागू गोल याःगु खः । अथेहे उलि हे गोल याःगु ब्राजिलया फ्रेडयात "सिल्भर बुट" लःल्हाःगु दु । टोरेस व फ्रेडं बराबरी गोल याःसां नं टोरेसया तुलनाय् फ्रेडं यक्व ई म्हितूगुलिं फ्रेड गोल्डेन बुट कायेगु पाखें बञ्चित जूगु खः । ब्राजिलया नेयमारं "ब्रोन्ज बुट" त्याकल ।

अथेहे ब्राजिलया गोलरक्षक जुलियो सेसरं "गोल्डेन ग्लोब" त्याकूगु दु । "फेयर प्ले"या सिरपाः धाःसा स्पेनं त्याकूगु दु ।

More Stories Like this