ग्याँस बिक्रेताया अल्टिमेटम
नेपाल ग्याँस विक्रेता महासंघं सरकारयात २५ गतेतक्कया अल्टिमेटम ब्यूगु दु । महासंघं सरकारं असार २५ गतेतक्कयादुने थःपिनिगु खँयात कयाः छु नं न्वंमवाःसा असार २५ गतेनिसें ग्याँस बिक्रि वितरण ठप्प यायेगु ख्याच्वः ब्यूगु दु ।
येँया मिडिया इन्टरनेशनलय् थौं छगू पत्रकार सम्मेलनया ग्वसाः ग्वयाः महासंघं थज्याःगु ख्याच्वः ब्यूगु खः ।
महासंघया नायः ज्ञानेश्वर अर्यालं व्यवसायीं ज्या यानाः नयेमफइगु अवस्था ब्वलन नं ग्याँस बिक्रि यानाः च्वनेमाःगु अवस्था वःगु धयादीगु दु ।
वय्कलं उपभोक्तां छ्यलीगु ग्याँसय् भ्याट छुट जुइमाःगु, म्होनिं न्यागू प्रतिशत कमिसन व्यवसायीतय्त दयेमाःगु, पुलांगु ग्याँसया सिलिण्डरपाखें जूगु क्षतित उद्योगीं फयेमाःगु, ग्याँस उद्योगया सिलिण्डरया जवाफदेहीता उद्योगी व सरकारं कायेमाःगु लगायतया मागत थःपिंसं न्ह्यःने न्ह्याकाःगु जानकारी बियादीगु खः ।
अथेहे नायः अर्यालं ह्याउँगु व वचुगु रंगया ग्याँस सिलिण्डर कार्यान्वयन मजूगु धयादिसें सरकार व उद्योगीं कमिसनया कासाय् छुं छुं सिलिण्डर जक रंग छ्यूगु द्वपं नापं बियादीगु दु ।
पाँचतारे होटलय् नापं वचुगु रंगया ग्याँस उपभोग मजूगु धयादिसें वय्कलं थुकिया अनुगमन यायेत व कार्यान्वयन यायेत सरकार दथुइ माग यानादीगु दु ।
