थौं असार १५ गते वा (धान) दिवस
थौं असार १५ गते नेपाःमि कृषकतय्गु महत्वया दिं । हरेक दँ असार १५ गतेया दिं नेपालय् वा अर्थात धान दिवस नापं हनाः वयाच्वंगु दु ।
‘वा उत्पादनय् वृद्धि, राष्ट्रिय अर्थतन्त्रया समृद्धि’ धइगु नारालिसे थौं झिक्वःगु राष्ट्रिय वा दिवस हनाच्वंगु दु । २०६१ साल मंसिर २९ गते सरकारं नेपालय् हरेक दँ असार १५ गतेया दिंयात राष्ट्रिय वा दिवसया रुपय् हनेगु निर्णय याःगु खः ।
न्हापाया दँय् असार १५ गते छन्हु जक वा दिवस हनाः वयाच्वंगु जूसां नं थुगु दँ छवाःयंक थीथी ज्याझ्वः याइगु जूगु दु । दिवसया लसताय् कृषि सम्बन्धी प्रचार प्रसार यानाः किसानतय्त प्रोत्साहन यायेगु उद्देश्यं छवाःयंक वा दिवस हनेत्यंगु कृषि लिसे सहकारी मन्त्रालयं जानकारी ब्यूगु खः ।
कृषिमन्त्री लिसे छ्याञ्जेया विशेष ब्वतिइ थौं यलया खुमलटार लिसे ख्वपय् रोपाई महोत्सव अन्तर्गत विशेष ज्याझ्वःया ग्वसाः ग्वःगु दु ।
कृषि विभागयाकथं नेपालय् वार्षिक थ्यंमथ्यं गुइगू अर्ब तका बराबरया वा उत्पादन जुइगु यानाच्वंगु दु । वंगु आर्थिक दँय् देय्न्यंक झिंप्यंगू लख नीद्वः व न्यासः व न्हय्गू (७०) हेक्टरय् वा खेती जुयाः पीन्यागू लख व प्यद्वः व न्यासः व स्वंगू टन वा उत्पादन जूगु कृषि विभागं जानकारी ब्यूगु खः ।
वंगु झिदँया तुलनाय् वा उत्पादनया वृद्धि छगू दशमलव च्यय्न्यागू प्रतिशतं जूगु दु ।
अथेहे, पर्यटकीय शहर पोखराय् असारे रोपाई महोत्सवया ग्वसाः ग्वःगु दु । पोखरा पर्यटन परिषद्या ग्वसाः लिसे लेखनाथ उद्योग वाणिज्य संघया ल्यू ग्वसालय् थौं न्हापाया दँय् थें लेखनाथ महोत्सव हनाच्वंगु दु । थौं रोपाई महोत्सव लेखनाथ नगरपालिका ९ बेगनाशताल लिक्क यायेत्यंगु महोत्सव मू ग्वसाः खलः समितिं जानकारी ब्यूगु खः ।
