प्यंगू कम्युनिष्ट पार्टी दथुइ एकता यायेगु सैद्धान्तिक सहमति
नेकपा–माओवादी लिसेया प्यंगू कम्युनिष्ट पार्टी दथुइ एकता यायेगु सैद्धान्तिक सहमति जूगु दु । नेकपा एकीकृतया ज्याकुथिइ च्वंगु सहलहसं नेकपा–माओवादी, नेकपा (एकीकृत) मातृका यादव नेतृत्वया माओवादी व मणि थापा नेतृत्वया क्रान्तिकारी कम्युनिष्ट पार्टी दथुइ एकताया सैद्धान्तिक सहमति जूगु खः ।
एकीकृत नेकपा माओवादीं पार्टी एकता जुइत्यंगु धकाः भ्रम न्यंकाच्वंगु इलय् नेकपा–माओवादीं क्रान्तिकारी कम्युनिष्ट पार्टीतलिसे एकताया कुतः न्ह्याकूगु खः ।
छगू हे क्रान्तिकारी पार्टी निर्माण यायेगु बिषयसं थौं नेकपा–माओवादीया नायः मोहन वैद्य, नेकपा (माओवादी)या कजि मातृका यादव, नेकपा (एकीकृत)या मूछ्याञ्जे परि थापा व क्रान्तिकारी कम्युनिष्ट पार्टीया मूछ्याञ्जे मणि थापा दथुइ सहलह जूगु खः ।
बैठकलिपा क्रान्तिकारी कम्युनिष्ट पार्टीया मूछ्याञ्जे थापां क्रान्तिकारी पार्टी एकताया सैद्धान्तिक सहमति मालेगु लिच्वः पिकाःगु जानकारी बियादीगु खः ।
बैठकलिपा प्यंगुलिं दलया शिर्ष नेतापिनिगु ल्हाःचिं दुगु बिज्ञप्तीइ फुक्क क्रान्तिकारी कम्युनिष्ट पार्टी व शक्तित दथुइ एकीकरणया प्रक्रिया न्ह्यःने न्ह्याकेगु न्ह्यथना थुकिइ ब्वति कायेत मेमेगु क्रान्तिकारी शक्तितय्त नापं इनाप याःगु दु ।
नेपाःया कम्युनिष्ट आन्दोलनय् दक्षिणपन्थी अवसरवाद व दलाल प्रवृत्ति मू समस्याया रुपय् दुगु न्ह्यःथना कम्युनिष्ट आन्दोलनया हाथ्याःलिसे न्ह्यःज्यायेत क्रान्तिकारीतय्गु एकताय् बहः ब्यूगु दु ।
थःपिंत लोकतन्त्रवादी व वामपन्थी धाइपिंसं छगू लिपा मेगु राष्ट्रघात यानाः वनाच्वंगुलिं आन्दोलनया उपलब्धिया रक्षाया नितिं एकताबद्ध जुइत इनाप याःगु दु ।
