नेवाःतय्गु डिएनए परिक्षण याइगु, नागरिक समाजया विरोध
नेवाः समाज दुनेया साय्मि, उराय व गुभाजुतय्गु डिएनए परिक्षण यायेत्यंगु दु । थुपिं समुदाय नेपालय् गुगु इलय् थ्यंगु खः धैगु सिइकेत त्रिभुवन विश्वविद्यालय जैविक प्रविधि केन्द्रीय विभाग व हैदराबादस्थित सेन्टर फर सेलुरल एन्ड मोलेकुलर बायोलोजी (सिसिएमबी) या मंकाः कुतलय् थ्व परिक्षण यायेत्यंगु खः ।
त्रिविवि जैविक प्रविधि केन्द्रीय विभागया सुपरभाइजर प्राडा कृष्णदास मानन्धरया कथं विभागया डा. तिलकराम श्रेष्ठ, प्राडा मोहन खरेल, सिसिएमबीया वैज्ञानिक डा थङ राजन, अविन्द कुमार व नेपाली विद्यार्थीपिं इसा प्रधान व नागेन्द्र अवस्थीया सहयोगय् थुगु परीक्षण यायेत्यंगु खः । झिंच्यादँनिसें ६० वर्ष उमेर समूहया ६३ म्ह मिजंतय् हि मुनाः डिएनए परिक्षण यायेत्यंगु धाःगु दु ।
डिएनए परिक्षणाया विरोध
नेवाःतय्गु थीथीजातया मूल सिइकेत यायेत्यंगु थुगु परिक्षणप्रति मूलबासी नागरिक समाजं आपत्ति प्वंकूगु दु । थ्व परिक्षणं जुइगु सकतां नकारात्मक प्रभावया जिम्मेवारी डिएनए परिक्षण याइगु संस्था बेहोरे यायेमाःगु धकाः समाजं धाःगु दु । थ्व हे सन्दर्भय् मूलबासी नागरिक समाज व नेपाल खड्गी सेवा समितिया ग्वसालय् कंकेश्वरीइ छगू बिचाः मुँज्या यायेत्यंगु दु ।
