येँ महानागरपालिकाया न्हूम्ह कार्यकारी अधिकृत नाप अन्तक्रिया

नेवाः जागरण मञ्चया ग्वसालय् येँ महानगरपालिकाया न्हूम्ह कार्यकारी अधिकृत लक्ष्मण अर्याललिसे म्हसिका व अन्तक्रिया ज्याझ्वः जुल । येँ महानगरपालिकाया वरिष्ठ पुलांम्ह वडाध्यक्ष चन्द्रानन्द नेवाःया सभापतित्वय् शनिवाः जूगु ज्याझ्वलय् महानगरपालिकाया प्रमुख लिसें कार्यकारी अधिकृत लक्ष्मण अर्याल मूपाहाँया रुपय् झायादीगु खः ।

उगु ज्याझ्वःयात कयाः नेवाः जागरण मञ्चया अध्यक्ष सुजीव बज्राचार्यं न्हूम्ह कार्यकारी अधिकृतयात लसकुस व म्हसीका ज्याझ्वः तयेमाःगुया मू आज्जु येँ महानगर पालिका दुनेया आदिवासी, मूलवासी नेवाः समुदाय जूगुलिं उगु समुदायलिसे सरसल्लाह व ग्वाहालि कयाः जक महानगरपालिकां थःगु खःगु ज्या न्ह्याके फइगु जूगुलिं ज्याझ्वःया ग्वसाः ग्वयागु खँ कनादिल ।

ज्याझ्वलय् महानगरपालिकाय् दलीय रुपय् आवद्ध एमाओवादीया उमेश स्थापित, एमालेया विद्यासुन्दर शाक्य, नेपाली कांग्रेसया भगवान शाक्यलिसें येँ महानगर विकास समूहया संयोजक चिनियामान बज्राचार्य, पुलांपिं वडाध्यक्षत पवित्र बज्राचार्य, चक्रमान डंगोल, विजयकृष्ण श्रेष्ठ, सुभानकुमार श्रेष्ठ, बद्री मानन्धर, माणिकरत्न स्थापितलिसें पुलांपिं जनप्रतिनिधिपिनिगु ब्वति दुगु खःसा नेपालभाषाया न्हिपौ सन्ध्याटाइम्सया सम्पादक सुरेश मानन्धर, कला क्षेत्रपाखें विजयरत्न असंबरे, व्यवसायीपाखें राजेन्द्रमान शाक्य, नेवाः स्वायत्त राज्य मंकाः संघर्ष समितिपाखें नरेश ताम्राकार, सम्पदा बचाऊ संघर्ष समितिपाखें श्याम मानन्धर व थीथी क्लवया प्रतिनिधिपिं उपस्थित जूगु खः ।

लसकुस व म्हसीका ज्याझ्वः धुंकाः महानगरपालिकायात सुझाव बीगु झ्वलय् महानगरपालिकां मूलतः फोहरमैलाया समस्यायात दीर्घकालीन समाधान यानाः बिजुली पिकायेगु प्लान्ट तयेमाःगु, स्थानीय नेपालभाषायात अंगिकार यानाः द्वैभाषिक नीति अवलम्वन यायेमाःगु, जात्रा पर्व संस्कृतिया लिसें नेपालभाषाया पत्रपत्रिका व संकिपाया प्रवद्र्धनय् ग्वाहालि यायेमाःगु व नेवाः स्वायत्त राज्य मंकाः सघर्ष समितिलिसे जूगु सम्झौता कार्यान्वयन यायेमाःगु खँत ज्याझ्वलय् ल्ह्वंगु खः ।

उगु सुझावयात कयाः प्रमुख अतिथि अर्यालं स्थानीय निकाय धयागु हे स्थानीय जनताया निंतिं दयेकूगु जूगुलिं थनया जाति भाषा संस्कृति व विकास आकांक्षा कथं थः न्ह्यायेगु व महानगरपालिकापाखें बीगु सेवा प्रवाहयात नं आधुनिकीकरण यायेगु खँ धयादिल ।

कार्यकारी अधिकृत अर्यालं थःम्हं च्वय्या अनुचित आदेश माने मयायेगु धासें तःधंगु निर्णय याये न्ह्यः सार्वजनिक सुनुवाइ यायेगु प्रतिबद्धता प्वंकादिल ।