राष्ट्रपति डा. यादव म्हं मफत
राष्ट्रपति डा. रामवरण यादबयात उसाँय् मन्त । शुक्रवाः शिक्षण अस्पतालय् वासः यायेत झायादीम्ह राष्ट्रपति डा. यादवया आतापुतिइ समस्या खनेदुगु खःसा डाक्टरतसें वय्कःयात मेथाय् रिफर याःगु शीतल निवासया श्रोतं न्ह्यथंगु दु । थ्वहे झ्वलय् वय्कःयात वासः यायेगु नितिं विदेश यंकेगु तयारी सरकारं यानाच्वंगु दु ।
राष्ट्रपतिया प्रेस सल्लाहकार राजेन्द्र दाहालया कथं राष्ट्रपतिया तपूगु आतापुतिइ दाग खनेदुगुलिं वासः यायेगु नितिं पिने देशय् यंकेमाःगु जूगु दु । आइतवाः जापान यंकेगु संभावना दुगु व अन मजूसा अमेरिका यंकीगु सल्लाहाकार दाहालया धापू दु ।
दाहालया कथं छुं महिना न्ह्यःनिसें प्वाःया समस्या जुयाच्वंगु खःसा वासः शिक्षण अस्पतालया ग्याष्ट्रोलोजिष्ट डा. शशि शर्मां यानावयाच्वंगु खः । डा. शर्माया सिफारिसय् म्हिगः शनिवाः ग्राण्डीइ अत्याधुनिक मेसिनय् सीटि स्क्यान याःगु इलय् तपूगु आतापुतिइ खनेदुगु खः ।
स्वन्हु न्ह्यःनिसें राष्ट्रपति डा. यादवयात झाडा जूगु व नये मयःगु समस्या खनेदुगु खः ।
