गोर्खा कपया न्हूम्ह विजेता मनांग मर्स्यांदी

नेपाल आर्मी क्लबयात बुकूसें मनांग मर्स्यांदी क्लबं न्हापांखुसी गोर्खा कप फुटबलया उपाधि त्याकूगु दु । शनिवाः जूगु फाइनल कासाय् नेपाल आर्मीयात छगूया विरुद्ध प्यंगू गोलं बुकूसें उगु उपाधि त्याकूगु खः ।

येँया दशरथ रंगशालाय् जूगु फाइनल कासाय् मनांगं उत्कृष्ट प्रदर्शन यासें समूह चरणय् बूगुया बदला नं काःगु दु । समूह चरणय् उत्कृष्ट प्रदर्शन यासें फुक्क कासा त्याकूगु आर्मीं समूह चरणया लिपांगु कासाय् मनांगयात छगू गोलं बुकूगु खः ।

शनिवाः जूगु फाइनल कासाय् मनांगं ९गूगु मिनेटय् शुलभ मास्केया गोलपाखें अग्रता काःगु खःसा १७गूगु मिनेटय् अनिल गुरुंगं मनांगया अग्रता निदुगं याःगु खः । तर कासाया २९गूगु मिनेटय् आर्मीया नितिं काशीराज कार्कीं गोल यानाः कासाय् लिहां वयेगु संकेत बिउगु खः । तसकं प्रतिस्पर्धात्मक जूगु न्हापांगु हाफय् निगुलिं क्लबं बाबांलाःगु ह्वःताः त्वःफिकूगु खः ।

निगूगु हाफया शुरुइ ४९गूगु मिनेटय् शुलभ मास्कें हानं गोल यासें मनांगयात छगूया विरुद्ध स्वंगू गोलं न्ह्यःने लाकल । ६४गूगु मिनेटय् आर्मीया राजु तामांगया प्रहार बारय् लानाः लिहां वयेवं आर्मी अभागी सावित जुल । थ्वहे झ्वलय् कासाया ८९गूगु मिनेटय् शुलभं हाकनं गोल यासें मनांगयात स्वंगू गोलं न्ह्यःने लाकूगु जक मखु, फाइनल कासाय् ह्याट्रिक यायेत तकं ताःलात । कासाया लिपांगु मिनेटय् आर्मीया काशीराजं गोल याःसां नं रेफ्रीं अफसाइड बीवं मनांगं छगूया विरुद्ध प्यंगू गोलं त्याकल । न्हापांगु संस्करण व निगूगु संस्करणय् फाइनल कासाय् थ्रीस्टार लिसे बूसें उपविजेताय् सीमित जूगु मनांग न्हापांखुसी गोर्खा कपया उपाधि ल्ह्वनेत ताःलात ।

प्रशिक्षक अमृत पन्तं क्लबया नेतृत्व लिपा सिजनया न्हापांगु कासाय् हे उपाधि त्याकूगु मनांगं १० गू लख तका नं त्याकल । उखे २० दँ लिपा रंगशालाय् उपाधि ल्ह्वनेगु ह्वःताः त्वःफिकूगु आर्मी ५ गू लख तकाय् चित्त बुझे यायेमाल ।

थ्वहे झ्वलय् आर्मीया टंक बस्नेत उत्कृष्ट कासामि घोषित जूगु दुसा स्ट्राइकरय् आर्मीया काशीराज कार्की व मिडफिल्डय् आर्मीया हे टंक बहादुर बुढाथोकि उत्कृष्ट घोषित जुल । मनांगया बिशाल श्रेष्ठ उत्कृष्ट गोलरक्षक, मनांगया कप्तान सागर थापा उत्कृष्ट डिफेण्डर व उत्कृष्ट प्रशिक्षकय् मनांगया अमृत पन्त घोषित जुल ।

(किपा साभार : अनलाइन खबर)

More Stories Like this