आयशा पाकिस्तानया न्हापांम्ह मिसा फाइटर पाइलट

'आयशा फारुख' पाकिस्तानया न्हापांम्ह मिसाम्ह विमान चालक जूगु दु ।

पाकिस्तानया पंजाब प्रान्तया बहावलपुरय् च्वनीम्ह २६ दँया आयशा फारुख लिपांगु झिदँय् पाकिस्तानया बायुसेनाय् दुथ्याःपिं १९ म्ह मिसापिं मध्ये छम्ह खः । फारुखया नापं मेपिं न्याम्ह पायलट नं ल्यःगु दु । गुपिं लडाईया नितिं तयार जुइ न्ह्यः लिपांगु टेस्ट पास याये ल्यंदनी ।

उत्तरी पाकिस्तानया मुशर्रफ बेसय् थः मिजं पासापिं नापं च्वनादीम्ह फारुखं थःत मिजंत स्वयां छुं फरक महसूस मजूगु व मिजंपिं थें बमबारी यायेत तकं सक्षम जूगु धयादीगु दु ।

पाकिस्तानय् मिसापिन्त स्वयेगु दृष्टिकोणय् ह्यूपाः वयाच्वंगु दुसा थौंकन्हय् आपालं मिसापिं पाकिस्तानी सेनाय् दुहांवनाच्वंगु धाःगु दु ।

इस्लामी देश मध्ये पाकिस्तान छगू अज्याःगु देश खः गन मिसातय्त नं सेनाया ततःधंगु पदय् नियुक्त यानाच्वंगु दु । अथेहे मिसातय्त युद्धक्षेत्रय् तकं तैनाथ यानातःगु दु ।

पाकिस्तानी सेनाय् थौकन्हय् ४,००० म्ह मिसापिं सैनिक दु । वंगु न्यादंनिसें आपालं मिसात पाकिस्तानी सेनाय् दुहांवगु खँ धाःगु दु ।

More Stories Like this