चुनावया निश्पक्षताय् शंका मयायेत रेग्मीया इनाप

अन्तरीम चुनावी मन्त्रीपरिषदया नायः खिलराज रेग्मीं थः ४१ दँ न्यायपालिकाय् ज्या याःम्ह मनू जूगलिं थःम्हेस्यां याकेत्यनागू चुनावया निश्पक्षताय् शंका मयानादीत इनाप यानादीगु दु ।

मंसीर ४ गतेया नितिं संविधानसभा चुनावया तिथि क्वःछिउगु कन्हय् अर्थात शुक्रवाः न्हापांखुसी देशवासीया नामय् संबोधन यानादिसें नायः रेग्मीं उकथं इनाप यानादीगु खः । वय्कलं थःगु छगू जक आज्जु निश्पक्षतापूर्वक संविधानसभाया चुनाव याकेगु खँ नं धयादिल । निश्पक्षता व तटस्थता थःगु जीवनया छगू जक आदर्श जूगु व थुकी छु नं सम्झौता मजुइगु नायः रेग्मीया धापू खः ।

मन्त्रीपरिषदया नायः रेग्मीं प्रधानन्यायधिसया भूमिका म्हिताच्वनाम्ह जूगुलिं थःगु नितिं सरकारया नेतृत्व यायेगु छुं नं कथंया व्यक्तिगत मोह वा महत्वाकांक्षाया विषय मजूसे देय् व जनताप्रतिया जिम्मेवारी व दायित्व कथं थुकियात ग्रहण यानागु धयादिल । वय्कलं छुं नं विषयस देशया जनतायात प्रतिनीधित्व याइगु राजनीतिक दलत दथुइ सहमति कायम यानाः विकल्परहित अवस्थाय् बृहत राष्ट्रिय सरोकार व दूरगामी महत्वया विषयस छुं नं जिम्मेवारी बिउसा उगु अवस्थाय् जिम्मेवारीपाखें विमुख जुइमज्यूगु नं धयादीगु दु ।

सम्बोधनया झ्वलय् थःगु नेतृत्व विशिष्ट अवस्थाय् जूगु धयादिसें थुकिं शक्ति पृथक्कीकरणयात क्रियाशील दयेकीगु नं दावी यानादिल । वय्कलं धयादिल, "शक्ति पृृथक्कीकरया मूलभूत मान्यता छम्ह हे मनू वा निकायं पृथक प्रकृतिया अधिकार छ्यलेमजिउगु व कार्यपालिकाया ज्याखँय् न्ह्याबलें न्यायिक नियन्त्रण दयेमाः धइगु खः । तर आः थःगु भूमिका न्यायपालिकाया पृथक जूगु सन्दर्भय् उकियात कयाः चिन्ता व ग्याचिकु मतयेत सकसित इनाप यानाच्वना ।"

अथेहे नायः रेग्मीं सरकार विरुद्ध आन्दोलन यानाच्वंगु दलयात वार्ताय् वयेत नं विशेष आह्वान यानादिल । वय्कलं सरकार दयेकेगु प्रकृयाय् असहमति तयेगु व चुनावया प्रकृयाया खँय् थी थी माग तयाः विरोध यानाच्वंगु दलयात तत्काल वार्ताय् वयाः सहलहपाखें समस्या ज्यंकेत व राजनीतिक दलं थःथवय् सम्वाद यानाः राजनीतिक मतभिन्नताया खँय् सहलहपाखें समस्या पिकयाः चुनावया नितिं मैत्री लकस दयेकाः ग्वाहालि यायेत नं विशेष इनाप यानादिल ।

थ्वहे झ्वलय् सरकार व नागरिक छगू आज्जु, छगू ज्या व छगू विषयस लक्षित जुयाः न्ह्याःवनेत नं सकलसित आह्वान यानादीगु दु ।