सिरियाया द्वन्दय् ९३ द्वः म्ह सित

सिरियाय् वंगु २६ ला न्ह्यःनिसें न्ह्यानाच्वंगु द्वन्दया झ्वलय् ९३ द्वःम्ह मनूत सीगु संयुक्त राष्ट्र संघं न्ह्यथंगु दु ।

बुधवाः सार्वजनिक याःगु प्रतिवेदनय् सिरियाय् न्ह्यानाच्वंगु ल्वापुइ सरकारी व विद्रोहीतय्सं तकं मानव ढालया कथं मस्तय्त छ्यःगु व द्वलंद्वः मस्त सीगु न्ह्यथनातःगु दु । प्रतिवेदन सार्वजनिक यासें संयुक्त राष्ट्र संघया मू छ्याञ्जे बान कि मुनं सिरियाया युद्ध आधुनिक संसारया हे छगू अस्वभाविक व अस्वीकार्य दुःख जूगु टिप्पणी यानादिल ।

सीपिं मस्तय्गु ल्याः सिरियाली सरकार वा अन ज्या यानाच्वंपिं सुयाके नं मदुगु धासें थुकिया नितिं अन ल्वापु शुरु जूसां निसें हे मस्तय्सं तसकं दुःख सियाच्वंगु धयादिल । ल्वापुइ मस्तय्या नितिं राष्ट्र संघीय प्रतिनीधिया ज्याकुथिं तयार याःगु प्रतिवेदनया कथं सिरियाय् बम विष्फोटया नापं मेमेगु आतंककारी ज्याया नितिं मस्तय्त छ्यःगु सीदुगु दु ।

सिरियाया विद्रोही पुचलं १५ दँ निसें १७ दँ तकया मस्तय्त विद्रोही सेनाय् भर्ति यानाच्वंगु बुखँत वयाच्वंगु नं प्रतिवेदनय् न्ह्यथनातःगु दु । नापं सरकारी सेनां नं मस्तय्त यौन दुव्र्यवहार यानाच्वंगु नापं उमिसं विद्रोहीया सूचं कायेगु ज्याय् तकं मस्तय्त छ्यःगु नं लूगु दु ।

सिरियाय् सन् २०११ मार्च महिनानिसें राष्ट्रपति बसीर अल असादया राजीनामाया माग यानाः आन्दोलन न्ह्याःगु खः ।

More Stories Like this