थ्रीस्टारयात बुकूसें मनांग गोर्खाकपया फाइनलय्

ए डिभिजन लिग च्याम्पियन थ्रीस्टारयात बुकूसें मनांग मस्र्यांदी गोर्खा कप फुटबलया फाइनलय् दुहांवंगु दु । विहिवाः जूगु कासाय् मनांगं थ्रीस्टारयात छगू गोलं बुकूगु खः ।

गोर्खा कपय् मनांगं थ्रीस्टारयात बुकूगु थ्व न्हापांखुसी खः । थ्व स्वयां न्ह्यः न्हापांगु व निगूगु संस्करणया उपाधि त्याकेगु झ्वलय् थ्रीस्टारं मनांगयात बुकूगु खः । आः उपाधिया नितिं मनांगं नेपाल आर्मी क्लबलिसे धेंधें बल्ला याइ । थ्व स्वयां न्ह्यः आर्मी ब्वाइज युनियन क्लबयात बुकूसें फाइनलय् थःगु थाय् पक्का यायेधुंकूगु दु ।

येँया दशरथ रंगशालाय् जूगु कासा तसकं प्रतिस्पर्धात्मक जूगु खः । न्हापांगु हाफयय् निखेरं छगू हे गोल मजूगु खः । न्हापांगु हाफया पीगूगु मिनेटय् विष्णु सुनुवारयात ह्याउँगु कार्ड क्यनेवं थ्रीस्टार झिम्ह कासामी सीमित जूगु खः । मनांगया सुजल श्रेष्ठयात फल तयेवं सुनुवारयात ह्याउँगु कार्ड क्यंगु खः । अथेखःसां निगूगु हाफय् मनांगयात दबाबय् तयेत ताःलाःगु खः ।

तर कासाया ८७ गूगु मिनेटय् सुजल श्रेष्ठया थासय् कासाख्यलय् कुहांवःम्ह विशाल राइ बिं मनांगया लागि गोल याःगु खः । कासाया अन्तिम मिनेटय् मनांगया योना इलियास व थ्रीस्टारया जगजीत श्रेष्ठयात ह्याउँगु कार्ड क्यंगु खः । व लिपा थ्रीस्टारया सरोज दाहालं बांलाःगु ह्वःताःयात सदुपयोग याये मफयेवं मनांग १ गू गोल त्याकूसें फाइनलय् दुहांवंगु खः ।

More Stories Like this