कांग्रेस थ्रेसहोल्ड त्वःतेत तयार : पौडेल
नेपाली कांग्रेसया उपसभापति रामचन्द्र पौडेलं थःगु पार्टीं समानुपातिकया न्यूनतम मत प्रतिशत थ्रेसहोल्डया अडान त्वःतेफइगु धयादीगु दु ।
बाँकेया नेपालगञ्जय् विहिवाः पार्टी कार्यकर्तातलिसे नापलायेगु झ्वलय् उपसभापति पौडेलं उगु खँ धयादीगु खः । वय्कलं थ्रेसहोल्डया विवादं मंसिरय् जुइगु चुनाव हे मजुइगु अवस्था ब्वलंगुलिं चुनाव यायेगु नितिं जूसां थःपिनिगु पार्टी थ्रेसहोल्डया अडान त्वःतीगु संकेत बियादिल ।
उपसभापति पौडेलं विवाद जुयाच्वंगु विषयस क्वःमिलु जुयाः नं कांग्रेस मंसिर दुने न्ह्याथे यानाः नं चुनाव जुइमाःगु पक्षय् दुगु धयादिल । वर्तमान सरकार चुनाव यायेगु नितिं जक दयेकूगु जूगुलिं आः चुनाव ऐन तत्काल पारित यानाः चुनावया तिथि घोषणा यायेत लिबाके मजिउगु खँय् बः बियादीगु दु ।
कांग्रेसं आःया संविधानसभाया चुनावय् बहुमत हइगु दावी यानादिसें उपसभापति पौडेलं चुनावया तयारीइ न्ह्यज्यायेत कार्यकर्तातय्त उजं तकं बियादीगु दु ।
