क्यालिफोर्नियाय् सिथिनखः व नेवाः अन्तरक्रिया

थ्व हे २०१३ जुन ८ शनिवाः कुन्हुं नेवाः अर्गनाइजेशन अफ अमेरिका नर्दन क्यालिफोर्नियाया ग्वसालय् ग्लाइन एलेनय् च्वंगु यति रेष्टुरांया चकं ख्यलय् नेवाःतय् तःजिगु नखः सिथिनखः झःझः धायेक हनेगु ज्या जुल । वरल्ड नेवाः अर्गनाइजेशनया नायो भाजु डा. बाल गोपाल श्रेष्ठया मूपाहांसुइ न्ह्यागु उगु ज्याझ्वलय् नेवाः आन्दोलनया बारे छगू अन्तरक्रिया ज्याभm्वः नं जुल ।

एनओए नर्दन क्यालफोनियाया मू छ्यान्जे भाजु शिबजी श्रेष्ठं लसकुस याना न्ह्याकुगु उगु ज्याझ्वलय् मूपाहां भाजु डा. बालगोपाल श्रेष्ठ व मय्जु श्रीलक्ष्मी श्रेष्ठपिनिगु म्हसिकेगु ज्या कार्यकारिणी सदस्य भाजु गजु श्रेष्ठं यानादिगु खःसा वयकपिंत खादा क्वखायेकेगु ज्या गोपाल खड्गीजुं स्वांथु लल्हाना हनेगु ज्या ज्याथ भाजु विष्णु शाक्यजुं यानादिगु खः ।

मू पाहां भाजु डा. श्रेष्ठं थःगु न्वचुया झ्वलय् थःथःवय् दयाच्वंगु मतभेदयात लोमंका सकलें झी नेवाः खः धैगु भावना ज्वनाः हलिं न्यंकया नेवाःत नेवाः जातिया हकहितया नितिं छप्पं छधि जुया न्ह्यज्याये माःगु खंय् बः बियादिल । नेवाः भाषा, नेवाः जातियात राज्यं क्वत्यलेगु ज्या राणा काल, पंचायत काल, बहुदल काल व थौंया गणतन्त्र कालय् नं कायम हे जुयाच्वंगुलिं नेवाः जातिया स्वशासन सहितया नेवाः राज्य माग जुयाच्वंगु खं ध्वाथुइका दिल । थी थी न्ह्यसःया लिसः ब्यूसें वय्कलं गथे खंय् भाय्यात राज्यं अफिस, अडालत, शिक्षण संस्थाय् छ्यलेगु सुविधा बियातल अथेहे नेवाःभाय् लगायत थी थी जातिया भाषायात नं फुक्क निकायसं छ्यलेगु समान अधिकार दयेमाःगु खं धयादिल ।

भाजु मदन मर्हजनं न्ह्याकादीगु उगु ज्याझ्वलय् नेपालभाषा साहित्यया इतिहास प्वलादिसें साहित्यकार मय्जु श्रीलक्ष्मी श्रेष्ठं नेवाःतय् थि थि थासय् थि थि भाषिका जुयाच्वंगुलिं भाय् व धकाः नागःतुगः यायेगु चलन दु, तर थज्यागु खंयात वास्ता मयासें झीसं न्ह्याथाय् च्वंसां न्ह्याथाय् वंसां थःगु भाय् ल्हायेगु त्वःते मज्यू धकाः धयादिल । वरिष्ठ मे च्वमि, संगीतकार अले समाजसेवि भाजु विष्णु शाक्यजुं नये, त्वने, पुने व आडम्बरय् जक जीवन फुकेगु मयासें थःगु जीवन कालय् थःगु भाषा, थःगु देशया लागि छुं यायेगु वाःचायेकेमा धकाः धयादिल । ज्याझ्वः झः झः धायेकेत वय्कलं थम्हं हे च्वयादिगु ज्ञानगुणया भजन मेत नं हाला न्यंकादिल । अथेहे नेपाल ओलम्पिक कमिटिया एक्जुकेटिभ सदस्य भाजु सुनिल राजकर्णिकारं थः नेवाः जुयागुया झीसं गौरव याये धकाः प्रतिज्ञा प्वंकादिसें सुनानं नेवाः जातियात हेये भावं खंल्हाइबले थःत असह्य जुइगु खं धयादिल । सल्लाहाकार भाजु गोपाल खड्गीं नेवाःत धइपिं न्ह्यागु दृष्टिं स्वःसां च्वन्ह्यापिं जाति खः, झीसं वं थथे यात वं अथे यात धकाः नुगः क्वतुंका जुयेगु पलेसा सकलें छप्प छधि जुयाः झी नेवाःत सुं स्वयां कम मखु धका न्ह्यावनेत आह्वान यानादिल ।

साहित्यकार मय्जु रिता देवी प्रधानं थः न्हापा खय् भासं जक च्वयेगु तर लिपा झीगु नेपालभाषाया महत्व थुसेंलि नेपालभाषाय् ल्हा न्ह्याकाः सपूmत च्वया पिथनागु खं कनादिल । झीगु समाजय् पुलांगु मेया महत्व बारे कनादिसें थौं स्वया न्यय्दं न्ह्यो वय्कलं न्यनादियागु मे न्यंका उकि ब्यक्त भविष्यवाणी थौंसत्य साबित जूगु खं नं कनादिल । नेवाः संस्कृतिया मर्मज्ञ भाजु भूपति राजोपाध्यायं नेवाःतय् संस्कृतिइ सगंया महत्व बारे ध्वाथुइका दिल । एनओए नर्दन क्यालफोनियाया सल्लाहाकार भाजु दिकेन्द्र मास्केजुं सकसितं सुभाय् देच्छानादिसें सकल नेवाः छवाः जुइत इनाप याना दिल । नायो भाजु नारायण सोमनामं “भाषा म्वासा जाति म्वाइ, जाति म्वासा देश म्वाइ” धकाः झी महाकवि सिद्घिदास महाजुं धयावंगु खं न्ह्यथंसें नेवाःतय्सं थःगु भाषा न्ह्याथाय् वंसां ल्हायेगु त्वते मज्यू । भाय् व धकाः नेवाःतय्सं करपिन्त हेपे यायेगु चलन दु, तर अथे धकाः हेपे याये मज्यु । नेवाःतय्सं थःथःगु थाय्या भाय् वसां थःगु भाय् ल्हायेगु त्वःते मज्यु धकाः सकसितं इनाप यानादिल ।

ज्याझ्वलय् ब्वति का झाःपिं सकसितं गुथिया ज्याथाम्ह सल्लाहाकार भाजु दिकेन्द्र मास्कें सिन्हं तिका, मेम्ह सल्लाहाकार भाजु गोपाल खड्गीं ह्यांगु क्वखां क्वखायेका नापं मिसा दुजःपिसं सगं लःल्हाना न्ह्यज्याकुगु उगु ज्याझ्वलय् सिथि नखः लुमंकेकथं क्वाक्वा वः व चतांमरी छुया नकेगु, समयबजि नकेगु अले ज्याझ्वःया अन्त्य लसता भ्वय् नकेगु ज्या नं जूगु खः ।

एनओएया आजीवन सदस्यपिं नारायण सोमनामे, बुद्घ महर्जन, शिबजी श्रेष्ठ, रमेश श्रेष्ठ, राजु श्रेष्ठ, यज्ञ श्रेष्ठ, आदिपिन्त मूपाहां डा. बालगोपाल श्रेष्ठजुं दसिपौ लःल्हायेगु व मय्जु श्रीलक्ष्मी श्रेष्ठं आजीवन सदस्य लगायत कार्यकारी सदस्यपिं गजु श्रेष्ठ, कमलेस सिंह, प्रज्वल बज्राचार्य, राजकुमार श्रेष्ठ, सल्लाहाकारपिं भाजु दिकेन्द्र मास्के व भाजु गोपाल खड्गी आदि सकलयात खादा क्वखायेका सन्मान यानादिगु खः । “टिच एर सेल्फ नेपालभाषा” व मेमेगु नेपालभाषाया सपूmत नापं पत्रपत्रिकात डा. बालगोपाल श्रेष्ठ, साहित्यकार मय्जुपिं श्रीलक्ष्मी श्रेष्ठ व रितादेवी प्रधानपिसं नायो भाजु नारायण सोमनामेया ल्हातय् लःल्हायेगु ज्या नं अन जूगु खः ।

क्यालफोनियाया थी थी थासय् बसोबास यानाच्वंपिं सत्यालंमयाक नेवाःभाजु मय्जुपिसं ब्वतिकयाः झः झः धायेकुगु उगु ज्याझ्वः न्हिनसिया छता इलं निसें न्ह्यानाः बहनिसिया झिता ई रिखें क्वचागु खः ।