त्रिशुली थ्री ए या क्षमता विस्तार मयाइगु
नेपाल विद्युत प्राधिकरणया कर्मचारीतसें त्रिशुली थ्री ए जलविद्युत आयोजनाया क्षमता विस्तार यायेगु क्वःछिना विरुद्ध आन्दोलन यायेवं नेपाल विद्युत प्राधिकरणं उगु क्वःछिना लितकाःगु दु ।
नेपाल विद्युत प्राधिकरण सञ्चालक समितिया बुधवाः च्वंगु मुँज्यां उकथं क्वःछिउगु खः । थ्व स्वयां न्ह्यः सरकारया दबााय् प्राधिकरण सञ्चालक समितिं ठेकेदारया प्रस्ताव कथं ६० गू मेगावाट क्षमताया आयोजनायात पुनःसंरचना यानाः ९० गू मेगावाट दयेकेगु क्वःछिउगु खः । क्षमता अप्वयेकेबलय् प्राधिकरणयात आर्थिक भार अप्वः लाइगु तर्क यासें प्यंगू कर्मचारी संगठनं आन्दोलन याःगु खः ।
थ्वहे झ्वलय् कर्मचारीतसें मन्त्री क्वार्टरय् न्हियान्हिथं प्यघौ तक ब्लाय्क आउट यायेगु नं प्राधिकरणं यानातःगु क्वःछिना लितकाःगु दु ।
केन्द्रीय कार्यालय रत्नपार्कय् फुक्क ज्या थप्प याःपिं कर्मचारीतसें देय्न्यंक हे प्राधिकरणया गाडि चलेयायेगुली पना बिउगु खः ।
बुधवाः सुथय् च्वंगु सञ्चालक समितिया मुँज्याय् सरकारं क्वःछिना लितकायेगु माने मजुइवं न्हिनय् स्वताः इलय् हाकनं मुँज्या च्वंगु खः । उगु मुँज्यां क्षमता विस्तार यायेगु क्वःछिना लित काःगु प्राधिकरणया कार्यकारी निर्देशक रामेश्वर रायं जानकारी बिउगु दु । तर आन्दोलन यानाच्वंपिं कर्मचारीतसें धाःसा निर्णयया पूर्ण लिखित स्वयाः जक थःपिन्सं आन्दोलन लित कायेगु कर्मचारी नेता शंकर बाराकोटीं धाःगु दु ।
