फ्रेञ्च ओपनय् नाडालया न्हूगु कीर्तिमान

बर्षया निगूगु ग्राण्डस्लाम फ्रेञ्च ओपन च्याक्वः खुसी त्याकूसें स्पेनिस कासामि राफाइल नाडालं न्हूगु कीर्तिमान तयेत ताःलाःगु दु । पेरिसया रोलाण्ड ग्यारोसय् आइतवाः जूगु फाइनल कासाय् डेभिड फेररयात बुकूसें स्वंगूगु वरियताया नाडालं उगु उपाधि त्याकूगु खः ।

न्हापांखुसी ग्राण्डस्लाम टेनिसया फाइनल कासा म्हिताच्वंम्ह ३१ दँया डेभिड फेररयात ६-३, ६-२ व ६-३ या तप्यंक स्वंगू सेटं बुकूसे नाडालं उगु उपाधिइ कब्जा याःगु खः । थ्वलिसें नाडालं १२ गूगु ग्राण्डस्लाम उपाधि त्याकेत ताःलाःगु दु ।

न्हापांखुसी सन् २००५ य् फ्रेञ्च ओपन त्याकूम्ह नाडालं सन् २००९ बाहेक लगातार सन् २०१३ तक थुगु उपाधि त्याकेत ताःलाःगु खः । नाडाल सन् २००९ लय् क्वाटरफाइनलय् बूगु खःसा उगु दँय् स्वीस कासामि रोजर फेडररं उगु उपाधि त्याकाः थःगु जीवनय् फुक्क ग्राण्डस्लाम त्याकूम्ह कासामितय्गु नां धलखय् थःगु नां च्वकेत ताःलाःगु खः । टेनिस कासाया महान कासामि फेडररं वहे दँय् छक्वः जक फ्रेञ्च ओपन उपाधि त्याकूगु खः ।

नाडालं फ्रेञ्च ओपन बाहेक सन् २००८ व २०१० य् विम्बल्डन, सन् २००९ लय् अष्ट्रेलियन ओपन व सन् २०१० य् यू.एस. ओपन त्याकूगु खः ।

More Stories Like this