बाखं च्वमि शाक्ययात "जय स्मारक सम्मान"
"करुणादेवी स्मारक धर्मार्थ गुथि, सिक्किम"पाखें नेपालभाषाया बाखं च्वमि भाजु राजा शाक्ययात आइतवाः वय्कःया हे छेँय् छगू ज्याझ्वःया दथुइ "जय स्मारक सम्मान" लःल्हात ।
नांजाःम्ह च्वमि नापं बाखं दबूया नायः भाजु लक्ष्मण राजवंशीया सभाध्यक्षताय् जूगु उगु ज्याझ्वलय् धर्मार्थ गुथिया भाजु राजीव शंकर श्रेष्ठं बाखं च्वमि शाक्ययात दोसल्लां न्ययेकाः हनापौ लिसें झिद्वः तका नं सम्मान कथं देछायादीगु खः ।
"थःगु जीवनया सर्वश्रेष्ठ दँया प्रारम्भनिसें आहुति बियाः प्राचीनकालीन दुर्लभ दस्तावेज नापं विरल हलंज्वलंयात अमूल्य धरोहरया रुपय् संरक्षित लिसें सुरक्षित तयेगुली अति महत्वपूर्ण भूमिका म्हिताः झीगु समाज अले राष्ट्रया जक मजुसे विश्वया हे छगू विशिष्ट संग्रहालय आशा सफूकुथिया पर्याय सिद्ध जूम्ह नापं नेपालभाषाय साहित्य व संस्कृतिप्रति गुग माया व भक्तिनापं समर्पित अथक आजीवन सेवा याना झायाः उगु फुक्क योगदानया सह्रानाय् भाज राजा शाक्य विद्यादायिनीया बरदपुत्रयात लःल्हायेगुली जिपिं गौरवान्वित दु" धकाः हनापती न्ह्यथनातःगु दु ।
ज्याझ्वलय् लसकुसया लिसें करुणादेवी स्मारक धर्मार्थ गुथिया म्हसीका भाजू राजीव शंकर श्रेष्ठं बियादिल । सम्मानित जुयादीम्ह भाजु राजा शाक्यं सिक्किमं निसें थःत सम्मान याःवःगु थःत जक मजुसे सकल नेपाःया नेवाःतय्त खः धयादीगु दु ।
बाखं च्वमिया दुजः शरद कसाः नं सुभाय् बियादीगु उगु ज्याझ्वलय् नेपालभाषाया आपालं च्वमि व पत्रकारतय्गु उपस्थिति दुगु खः ।
