च्वसापासाया छेँ उलेज्या

नेपालभाषाया साहित्यिक संस्था च्वसापासाया थःगु छेँ छगू ज्याझ्वःया दथुइ उलेज्या याःगु दु ।

येँया रक्तकाली, कुलांभुलुइ जूगु उगु ज्याझ्वलय् च्वसापासाया पुलांम्ह नायः नापं नेपालभाषा एकेदमिया चान्सलर संस्कृतविद् सत्यमोहन जोशीं च्वसापासाया छेँया लुखाया ताःफ्वः चायेकाः उलेज्या यानादीगु खः ।

च्वसापासाया नायः पद्मरत्न तुलाधरया सभाध्यक्षताय् जूगु उगु ज्याझ्वलय् जनकबि दुर्गालाल श्रेष्ठं नं न्ववानादीगु खः । संस्थाया छ्याञ्जे भूषण प्रसाद श्रेष्ठं छेँ दनेगु ज्याया प्रगति विवरण न्ह्यब्वयादीगु खः ।

येँया रक्तकाली, कुलांभुलुइ च्वंगु प्यंगू तल्लाया च्वसापासाया उगु छेँ ने.सं. ११३१ चौलागा १३ कुन्हु संस्कृतविद् सत्यमोहन जोशीं जग स्वनाः शिलान्यास यानादीगु खः ।