झिंनिक्वःगु धर्मादित्य धर्माचार्य सिरपाः लःल्हात
च्वमि बसन्तमान महर्जनयात "झिंनिक्वःगु धर्मादित्य धर्माचार्य सिरपाः" छगू ज्याझ्वःया दथुइ शनिवाः नेपाल प्रज्ञा प्रतिष्ठानया प्राज्ञ दुजः सुलोचना मानन्धरं लःल्हानादिल । ज्याझ्वःया मूपाहां प्राज्ञ मानन्धरं सिजःपौ नापं न्याद्वः व छतका नं लःल्हानादीगु खः । अथेहे ज्याझ्वलय् नेवाः संस्कृतियात नेपाः दुने व नेपाः पिने प्रचार प्रसार यायेगु ज्याय् विशेष योगदान बियादीम्ह भाजु गणेशराम लाछि प्रजापतियात "धर्मादित्य धर्माचार्य हना"पाखें सम्मानित याःगु खः ।
मां भाय् पुचःया नायः बिजय बहादुर शाक्यया सभाध्यक्षताय् जूगु उगु ज्याझ्वलय् नेपालभाषा मिसा खलः येँया नायः मंगला कारञ्जित, नेपालभाषा केन्द्रीय विभागया नायः सह प्रा. तुलसीलाल सिंह, नेपालभाषा मंकाः खलः यलया नायः किरण शाक्यं सिरपाः त्याकादीम्ह व सम्मानित जुयादीम्हेसित भिंतुना देछाःगु खः ।
पुचःया दुजः हिराकाजी महर्जनं सिरपाः त्याकादीम्ह बसन्तमान महर्जन व सम्मानित जुयादीम्ह गणेशराम लाछि प्रजापतिया म्हसीका ब्वना न्यंकादीगु उगु ज्याझ्वलय् सिरपाः मूल्यांकन कमिटिया कजि डा. पुष्पराज राजकर्णिकारं मूल्यांकनयात कयाः न्ववानादीगु खः । अथेहे सिरपाः त्याकादीम्ह महर्जन व सम्मानित जुयादीम्ह प्रजापतिं नं थःगु नुगः खँ प्वंकादीगु खः ।
नेपालभाषाया न्हापांम्ह पत्रकार नापं बौद्ध विद्वान धर्मादित्य धर्माचार्यया सच्छि व झिंनिदँ बुदिंया लसताय् जूगु उगु ज्याझ्वलय् आपालं साहित्यकार, भाषासेवीपिनिगु उपस्थिति दुगु खः ।
More Stories Like this
काेरियाय् नेवाः भ्वय्, नम्रता श्रेष्ठयात हन न्यूयाेर्कय् इहि राजनीतिक दलतय् घोषणापत्र व नेवाः दृष्टिकोण किपुली मंकाः बाखं गोष्ठि "वर्तमान राजनीतिक संन्दर्भय् नेवाः स्वायत्त राज्य" सम्बन्धि गोष्ठी
