देय् दबूया विवाद ज्यांकेत पद्मरत्नया संयोजकत्वय् सहजीकरण पुचः
नेवाः देय् दबूया खुक्वःगु तःमुँज्या लिपा ब्वलनाच्वंगु समस्या ज्यंकेया निंतिं नेवाः देय् दबू तःमुँज्या सहजीकरण पुचः नीस्वंगु दु ।
बछलागाः आमै शनिवाः कुन्हु च्वंगु नेवाः देय् दबूया केन्द्रीय समितिया मुँज्या नेवाः देय् दबूया सल्लाहकार पद्मरत्न तुलाधरया संयोजकत्वय् थुगु सहजीकरण पुचः नीस्वंगु खः । नेवाः देय् दबूया सल्लाहकारपिं दुथ्यागु थुगु सहजीकरण पुचया सहसंयोजक कथं डा. पुष्पराज राजकर्णिकार व दुजलय् ई. मोहनकृष्ण डंगोल, डा. सुमित्रा मानन्धर, नरेन्द्रभक्त हाडा व प्रकाश पालिखे च्वनादीगु दु । लच्छिया दुने थुगु सहजीकरण पुचलं निगू पक्ष नाप सहलह ब्याकाः तार्किक निश्कर्षय् थ्यंकीगु खँ धाःगु दु ।
नापं देय् दबूया केन्द्रीय समितिया मुँज्यां नेपाल आदिवासी जनजाति महासंघया महाधिवेशनय् नेवाः देय् दबूया आधिकारीक निर्णय कथं नायः नरेश ताम्राकार महासंघया नायः पदय् उम्मेदवारी बिउगु खँयात कया महासंघय् भ्रमपूर्ण उजुरी तःगु खँ प्रित खेद प्वंकगु दु ।
