जागरण मञ्चं असंबरे व बज्राचार्ययात भिंतुना देछात
नेवाः जागरण मञ्चया भातृ संगठन नेवाः जागरण संकिपा समितिं सिनेपत्रकार लिसें समितिया प्रमुख विजयरत्न असंबरेयात भिंतुना देछा ज्याझ्वः याःगु दु ।
सिने पत्रिका कामना मासिक व नेपाल समाचार पत्रया प्रधानसम्पादक पुष्करलाल श्रेष्ठया मूपाहाँसुइ जूगु ज्याझ्वलय् विजयरत्न असंबरे व वय्कःया तिरिमय्जु बाखंच्वमि मीना बज्राचार्ययात कथहं चलचित्र पत्रकार संघं चलचित्र पत्रकारिता पुरस्कार – २०६९ व नेपालभाषा परिषदं दान्यहिरा हःपाः सिरपा लःल्हाःगु लसतया् भिंतुना देछा ज्याझ्वः याःगु खः ।
ज्याझ्वलय् मूपाहाँया थासं न्ववानादिसें प्रधानसम्पादक श्रेष्ठं विजयरत्न असंबरे न्हापा कामना प्रकाशनपाखें व्यवसायिक सिने पत्रकारिता यायेत न्ह्यज्याःगु खँ कनादिसें विजयरत्नयात थुकथं भिंतुना देछाय् दयाः थःत गौरव अनुभव जूगु विचाः प्वंकादिल ।
उगु ज्याझ्वलय् चलचित्र पत्रकार संघया नायः विदुर गिरीं चलचित्र पत्रकारिता सम्मान लःल्हाःम्ह व्यक्ति विजयरत्नयात नेवाः जागरण संकिपा समितिं हाकनं भिंतुना देछाना चलचित्र पत्रकार संघया गरिमा अझ अप्वयेका ब्यूगु धयादिसें पत्रकार असंबरे व बाखंच्वमि मीना बज्राचार्ययात भिंतुना देछाना दिल ।
ज्याझ्वलय् नेवाः जागरण संकिपा समितिं भिंतुना पौ व देछा लःल्हाःगु खःसा रामशेखर हना ज्याझ्वः समितिया संयोजकलिसें पाहाँ राजेन्द्रमान शाक्यं दांतका लःल्हाना दीगु खः । ज्याझ्वलय् भिंतुना लःल्हानादीपिं सकसितं पत्रकार असंबरे व कथाकार मीना बज्राचार्यं सुभाय् देछासें थःगु नुगःखँ तयादीगु खः ।
संकिपा समितिया दुजः रवि महर्जनं न्ह्याकूगु ज्याझ्वलय् लसकुस समितिया सचिव सुरेन्द्र तुलाधरं यानादीगु खःसा ज्याझ्वः जागरण मञ्चया अध्यक्ष सुजीव बज्राचार्यया सभापतित्वय् जूगु खः ।
