पुलांम्ह सभासद हकया हत्याय् जहान व म्ह्याय्या ल्हाः
पुलांम्ह सभासद सदरुल मियाँ हकया हत्याय् दुथ्याःगु द्वपनय् शुक्रवाः हकया जहान नूरजहाँयात प्रहरीं ज्वंगु दु । नेपाल प्रहरीया केन्द्रीय अनुसन्धान ब्यूरोया विशेष पुचलं कल्याणपुर गाविस-२ स च्वंगु हकया छेँपाखें ५० दँया नूरजहाँयात ज्वंगु खः ।
थ्व स्वयां न्ह्यः म्हिगः जक प्रहरीं हकया म्ह्याय् १९ दँया रुवेदा खातुनयात कल्याणपुरया छेँपाखें व स्यायेगु ज्याय् प्रत्यक्ष कथं ल्हाः दुम्ह सिरहाया चतरी गाविस-६ स छेँ दयाः थौंकन्हय् लहान नगरपालिका-५ पानीट्यांकीइ च्वंम्ह ४० दँया अब्दुल रउफयात लहानपाखें ज्वंगु खः ।
सगरमाथा अञ्चल प्रहरी ज्याकू राजविराजय् शुक्रवाः ग्वसाः ग्वःगु पत्रकार सम्मेलनय् पुलांम्ह सभासद हकया मू योजनाकार जहान नूरजहाँ, म्ह्याय् रुबेदा व प्रत्यक्ष कथं दुथ्याःम्ह रउफयात ज्वनाः अनुसन्थान न्ह्याकूगु पूर्व क्षेत्रीय प्रहरी ज्याकूया प्रहरी नायब महानिरीक्षक परशुराम खत्रीं जानकारी बियादिल । उगु हत्याय् दुथ्याःम्ह रुवेदाया मतिनामि लहान-५ या ३७ दँया जमिरुल शेख व सिरहा चतरी गाविस-२ या ३२ दँया एनुल शेख धाःसा बिस्युंवनाच्वंगु दु ।
रुवेदा व जमीरया मतिनाय् मां नूरजहाँया सहमति दुसां नं हकया समर्थन मदयेवं मतिनाया पंगः जूगु बिचाः यानाः हकयात स्याःगु अनुसन्धानय् खनेदुगु प्रहरीं जानकारी बिउगु दु ।
प्रहरीं बरामद याःगु पूर्व सभासद हकया मोबाइल, सीमकार्ड व पकेट चक्कुया लिधंसाय् हत्याय् ल्हाः दुपिन्त म्हसीकेत ताःलाःगु नं धाःगु दु ।
अनुसन्धानया झ्वलय् जेठ ५ गते सुथसिया खुताः इलय् सिरहया गम्हरियाय् च्वंम्ह एनुलया ससलय् दयेकूगु योजना कथं एनुल व रउफ कल्याणपुर वःसां नं अनुकूल मजुइवं चान्हय् १ ताः इलय् लहान लिहांवंगु खः ।
जेष्ठ ६ गते बहनी पुलांम्ह सभासद हक पेट्रोलपम्पय् याकःचा द्यनाच्वंगु खबर हकया म्ह्याय् रुबेदां जानकारी बीवं बहनी गुताः त्या इलय् लहानं मोटरसाइकलपाखें पेट्रोलपम्पय् वयाः उमिसं स्याःगु प्रहरी नायब महानिरीक्षक खत्रीं धयादिल ।
प्रहरीं शुक्रवाः हे कर्तब्यज्यान मुद्दा दर्तायासें अदालतपाखें म्याद तनाः थप अनुसन्धान यायेगु न्ह्यथंगु दु ।
