कमलरीतपाखें बन्दयात निरन्तरता, थीथी ख्यःपाखें दमनया विरोध
कमलरी संघर्ष समितिं थीथी माग तयाः यानाच्वंगु तराई बन्दया कारणं बिहीवाः नं अनया जनजीवन प्रभावित जूगु दु । मंगलवाः निसें अनिश्चितकालया निंतिं कमलरीतय्सं बन्दया घोषणा याःगु खः ।
सरकार नाप जूगु वार्ता सफल मजुइवं कमलरीतय्सं आन्दोलनपाखें थःपिनिगु माग सम्बोधन याकेत बन्दया आव्हान याःगु खः । बन्दया कारण तराईया सवारीसाधन, ज्याकू, शिक्षण संस्था, उद्योग व्यवसाय ठप्प जूगु दु ।
थ्वहे दथुइ थीथी जिल्लाय् जुयाच्वंगु कमलरी आन्दोलनय् जूगु बर्बर प्रहरी दमन व ज्यादतीया नेपालया आदिवासीतय् मानव अधिकारसम्बन्धी वकिल समूहं (लाहुर्निप) घोर भत्सर्ना याःगु दु । नापं नेवाः विद्यार्थी दबूली नं छगू विज्ञप्ति पिथना उकीया विरोध याःगु दु ।
देउखुरी लालमाटियाया १२दँया कमलरी सृजना चौधरीया २०६९ चैत्र १४ गते यालय् हत्याय् संलग्नयात तत्काल ज्वना कडा कारवाही यायेमाःगु, कमलरी मुक्तिया घोषणा व अधिकारको सुनिश्चित यायेमाःगु माग यानाः पुलांपिं कमलरीतय्सं आन्दोलन यानाच्वंगु खः ।
