युनिभर्सिटी अफ वाशिङटनय् नेपाःया राजनीति व जातिय पहिचानबारे न्वचु

राजतन्त्रया अन्त्यपाखें नेपाःया संस्कृतिइ लाःगु लिच्वः, पहिचानया राजनीति व नेपाःया वर्तमान राजनैतिक अवस्था बारे युनिभर्सिटी अफ वाशिङटन, सियाटलय् जून ३, सोमवाः छगू न्वचु ज्याझ्वः क्वचाल । उगु न्वचु ज्याझ्वः अक्सफोर्ड युनिभर्सिटीया डा. बालगोपाल श्रेष्ठं बियादीगु खः ।

डा. श्रेष्ठं थःगु न्वचुइ नेपाःया राजतन्त्रया अन्त्यं नेपाःया संस्कृतिइ अप्वः लिच्वः मलाःगु ख“ न्ह्यथना दिल । अथे हे वय्कलं नेपाःया भाषिक व जातिय समानतया लागि संघियताया महत्व बारे बः बियादिल । बहुभाषिक, बहुजातिय व बहुसांस्कृतिक देय् नेपालय् छगू जाति विशेषया भाषा, संस्कृति व धर्मं मेमेगु थीथी जाति, जनजातियात क्वत्यलाः वयाच्वंगुलिं देशय् जातिय पहिचानया लागि थीथी जाति जनजातित न्ह्याः वःगु खँ उल्लेख यानादिल । अन्तय् वय्कलं नेपाःया वर्तमान अवस्था बारे कुलादिसें न्हापांगु संविधान सभां संविधान दयेके मफयेक विघटन जू थें आः वइगु चुनावय् नं गुगु नं पार्टीं बहुमत हये मफयाः देय् हानं वहे अन्यौलया अवस्थाय् थ्यनीगु खःला धकाः ग्याःच्वः प्वंकादिल ।

न्वचु लिपा जूगु न्ह्यसः लिसलय् मेमेगु जाति जनजातित थें नेवाःत नं उतिकं हे उत्पीडनय् लानाच्वंगु ख“ वय्कलं ध्वाथुइका दिल । छगू न्ह्यसःया लिसलय् नेपालय् राजतन्त्र तसकं बदनाम जुइधुंकूगुलिं हानं राजतन्त्र लिहां वये फइगु शंभावना तसकं म्हो जक दुगु खँ कनादिल ।

युनिभर्सिटी अफ वाशिङटन स्कूल अफ इन्टरनेश्नल स्टडिजपाखें ग्वसाः ग्वःगु उगु ज्याभ्mवलय् दक्षिण एसिया विभागया डा. लिन्डा इल्टिसं लसकुस यानादीगु खः । ज्याझ्वलय् थीथी विभागया खुइम्ह मल्याक मनूतय्सं ब्वति काःगु खः ।